就算再用上另一個十年，也找不到一對比郭富城、鄭伊健更適合演《風雲Ⅱ》的拍檔。這兩個男人十年來風光過、黯淡過，如今愛情、事業兩皆得意，且還雙雙進身影帝行列，磨劍十年，兩人所經歷的事業波幅起跌竟如此相似。或者正如《風雲Ⅱ》中黃德斌飾演的第一邪皇所言：「風雲，你倆始終同出一脈。」但人生有幾多個十年？城城、伊健連同一眾等睇《風雲Ⅱ》等足十年的fans，應該最有體會。
距離上一次看到郭富城演步驚雲、鄭伊健演聶風，要數到十年前，伊健說：「十年前拍完第一集，一心以為會即刻開續集，點估到一等十年？十年來我冇放低過聶風呢個角色，因為佢喺第一集性格都冇發揮，所以拍唔到續集我唔甘心，一直爭取，聽到林小明話要開《風雲Ⅱ》，故事仲要係講聶風入魔，我好雀躍。起初以為入魔好易演，點知一拍就知難，但導演彭氏兄弟叫我當自己係架火車頭咁演就得架喇。」
以拍攝驚慄電影起家的彭氏兄弟，果然予人「估你唔到」的感覺，既然伊健可以藉入魔來搶鏡，近年接演角色例必有所發揮的城城，又怎會坐以待斃？城城說：「十年前我個角色都好簡單，戴起個藍色假髮，唔使點做戲嗰份冷漠已經出晒嚟，今次角色就有血有肉，我唔單只同對手做戲，我仲同布景做戲，同兵器做戲。十年前我係個歌手，孭住個偶像包袱嚟做戲，今時今日我好清晰，我係個演員，完全冇晒包袱。」
藍幕前過招 冇難度
城城的「跟對手、布景、兵器做戲論」，絕對不是sound-bite，對比上集樂山大佛實景拍攝，《風雲Ⅱ》極其量只是演員在藍幕前憑幻想力馳騁的一個江湖。憑電影《第一誡》贏得「第12屆富川國際電影節」影帝殊榮的伊健，向來喜歡挑戰難度，他說：「其實喺《430穿梭機》嗰個年代我已經拍過藍幕，今次唔同在個藍幕好大，成個廠咁大，比起我拍《幪面超人》仲要大。我認為一係唔拍，一拍就要個畫面好流暢，喺廠拍可以更加配合特效，當年嘅《風雲》係實景多，但十年後已經唔可以用同一種拍法。」
兩屆金馬影帝得主城城，在藍幕前一樣應付自如，他說：「我哋兩個要打，唔只要夾動作，仲要夾埋特效，劈一刀可以劈足一個上晝，唔夠毅力嘅話好容易半途而廢，但彭氏兄弟嘅創意，同埋全心想打造一個耳目一新嘅武俠世界，推動咗成組人，當你見到演無名嘅何家勁一得閒就喺片場做sit up，劇組入面啲龍虎武師個個都操到好弗，我都要落足心機去操弗隻麒麟臂。」
感情入戲唔使經歷
男人的一雙強勁臂彎，向來是女人的棲息之地，《風雲Ⅱ》中步驚雲雖照舊有楚楚默默地守在身邊，但步驚雲就是愛理不理，教人聯想到現實中城城與熊黛林的緋聞，面對這個情感的禁區，城城一雙排雲掌教人難越雷池半步，他說：「套戲主要係講兄弟情，好多電影嘅感情世界都係靠幻想，係咪現實中要經歷過先演得？未必！好演員係要代入個角色，要累積經驗，埋位時感情就可以自然流露，唔需要考慮咁多。」
聶風愛得浪漫
相比起城城，伊健面對感情問題，就頗能做到聶風「心若冰清，天塌不驚」的境界，他說：「我條感情線係同第二夢，佢同聶風係由書信開始，文字傳情到後來見面，起初都唔知有冇機會見，我覺得個戲寫得好浪漫，現實中好少見，或者愛情遠觀係好啲嘅。」
後記：人生長途賽 珍貴在過程
回望十年，城城與伊健都曾經有過「困惑時期」，城城對金馬封帝前一段瓶頸歲月，他說：「人生有高有低，我當係一種磨練，低潮係畀自己進修，人要成長先可以再闖高峰，人生係個長途賽，冇人知邊度係終站。」曾為餬口扮過閒角的伊健十分同意：「順境睇到嘅嘢會較逆境少，人生未走完，過程最珍貴，至少我付出過，我enjoy。」
沒錯，一時落魄理應視作等閒，事關英國有位在世界歷史舞台上叱咤風雲的前首相，他從張伯倫手上接任首相前，投閒置散了足足十年，他的名字：邱吉爾——公認的二十世紀風雲人物。
文：陳專
攝：黎志輝
場地：蘭桂坊酒店 九如坊
化妝：Terry Yu（郭富城）Jessica Chan（鄭伊健）
髮型：Herman Law @ ii salon（郭富城）Alex Wu @ Headquarter（鄭伊健）