名模Lisa S.是城中搶手的模特兒，但出得廳堂的她，卻非入得廚房，「最叻」只是煮即食麵，難怪她也自嘲是可怕的家庭主婦！不過廚藝麻麻的她就自製銀戒指，成功冧掂男友吳彥祖（Daniel）。

昨日，Lisa S.率領其餘三名模特兒，為珠寶設計及雕刻家陳世英舉辦的藝術珠寶世界巡迴展行騷。大會公關表示Lisa有意向陳世英拜師學藝，Lisa亦直認不諱，並表示願意付出任何代價，她說：「係呀，因為我自己好鍾意整首飾，喺後台問咗佢好多問題，佢話可以明年做我師傅。」Lisa更謂計劃長期跟師傅學設計及技術，並豪爽表示：「只要佢教我，我會Pay anything。」

放大圖片	模特兒示範由陳世英設計的珠寶。	Lisa S.聖誕節會跟男友分開過。

講到整首飾，Lisa就自爆多年前親自DIY了一枚銀戒指送給男友Daniel，更自豪地說：「佢好鍾意，因為係我整o架嘛，佢依家都有戴，不過唔知佢戴喺邊隻手指，不過嗰隻戒指其實好簡單，好似小朋友整嘅咁！」

分開過聖誕

聖誕節將至，Lisa透露Daniel會在內地拍戲，於工作中度過，兩人要分隔異地各自慶祝。Lisa自言不需要任何禮物，但就恨食火雞，不過自爆廚藝差強人意的她要找朋友代勞，她解釋：「自己整？我唔想死住喎，我係好可怕嘅廚師，又係好可怕嘅家庭主婦，Daniel煮得叻過我，我洗嘢都仲得，淨係識煮即食麵，所以我會請教Ana R.同埋Amanda S.。」難怪她也笑言男友真的很不幸。

文：名人組