玩具城董事鄭躬明女友兼模特兒陳君宜（Qinnie）早前成為老闆娘，跟友人投資六位數在中環開設時裝店，日前她專程到店舖坐鎮，甫入店內即走到櫥窗前，動手為假人公仔換衫，其後又烏身移動櫥窗的擺設，吸引不少途人眼望望。期間有女顧客光臨，Qinnie即時放下手上工作，向對方勁Sell，還細心地為對方試衫，最後成功冧掂客人幫襯。
事後Qinnie向記者表示時裝店剛開業兩個月，所有貨都是由歐洲、英國等地入口，她平均每月會到外地入貨一次，包括女裝、童裝、袋、鞋及首飾等。Qinnie又坦言只要在港，她每日都會落舖巡視。雖然很忙，但她卻樂在其中：「我以前係讀Fashion，向來都鍾意捐窿捐罅去買衫，依家可以名正言順咁買。」Qinnie更開心表示首月已有錢賺，有信心數個月便可以回本。
