假設性問題：突然有$20萬閒錢在身，你會買甚麼？答案可能是車，或者當首期供層樓，但小記卻選德國Loewe出品、身價高達20多萬元的52吋LCD TV Reference，採用Cyber感極重的鋁合金外殼，並內置500GB硬碟及Wi-Fi功能，錄影及多媒體播放同樣出色，石詠莉試睇過後，立即將答案改成與小記一樣：Reference。

鋁合金外殼夠Cyber

石詠莉最近忙着灌錄個人專輯，閒時就喜歡睇電視減減壓，但嫌市面上部部電視都離不開長方外形加個膠質黑框，所以一睇到Reference就即時雙眼發光！採用冷酷的鋁合金外殼，配合6cm纖薄機身及座地式電視架，流露出一股高貴格調，品味指數即時上升。

雖及不上新一代以纖薄見稱的Edge LED機種，但機身最厚只有6cm，以52吋LCD TV來講已夠晒纖薄。	遙控器外形金屬感強，拿在手上亦夠晒重量感，原來獨立發售時賣成$9,800。	輕按遙控器就能控制座地架向左右作最大35度調節，坐在客廳任何一個角落都睇得咁清晰。

多媒體Wi-Fi傳送

下載了數以TB計的多媒體短片及音樂檔案，用十幾吋電腦芒睇，睇不夠一個鐘就已經眼攰頸痛，Loewe就在Reference引進Wi-Fi功能，將電腦上的多媒體檔案分享至電視，用52吋超震撼屏幕慢慢欣賞，還可以用電視的靚聲音響系統來播放音樂，連MP3都即時變得清晰細膩。

當機面的光源感應器會感應到環境光暗，從而自動調暗畫面的光度，減少刺眼感令用家睇得更舒服。

屏幕下設有4組喇叭，支援4×40W輸出功率，人聲對白清晰自然，背景環境聲包圍感強。

500GB硬碟錄影

石詠莉一直是電視劇《富貴門》的忠心Fans，Reference內置500GB硬碟，能將心水的電視節目錄在硬碟上，有時間才慢慢欣賞，亦省卻了放置錄影機的地方及接駁的麻煩。同時能將短片、相片及音樂儲存在硬碟上，想睇戲定聽歌睇相都一樣簡單。

菜單畫面簡單易睇，就算是影音初哥都能簡單地選擇透過Wi-Fi轉播電腦上的檔案，或播放儲存在硬碟內的節目。

機背備有兩組HDMI插口，剛好駁齊Blu-ray機及機頂盒。

200Hz屏幕流暢自然

傳統上專注外形設計的高級歐洲影音品牌，都不太積極引進新技術，但Reference卻打破傳統框框，加入近年電視界極流行的200Hz屏幕，透過模擬插播技術令動態畫面更為穩定自然，試播《變形金剛2》這類充滿動感的科幻動作電影，同樣流暢自然冇起格，睇柯柏文吸收天火升呢變身一幕最正。

畫質測試：動態場面流暢穩定

試播BD版的《智能殺機》，特別揀選了戰機高速飛行的一幕，普通LCD TV播放時可能已經殘影重重，但Reference的200Hz屏幕卻令如此高速的動態場面保持流暢穩定。

規格表

屏幕尺寸：52吋

解像度：1,920×1,080

對比度：30,000:1

體 積：1,295×1,201×60mm

重 量：59kg

撰文：周仲明

攝影：譚建章