早前一班網友於網上熱捧印尼即食撈麵，今日借勢找來味之天使蜜瓜（關婉珊）試食坊間中、泰、印三地特色撈麵，發掘新風味之餘，仲教你點撈嚟食至最滋味。

中：桂林腩米撈 藥材夠香

在內地專營正宗桂林米粉的連鎖小店「黑鼻子」最近殺入旺角，米粉全由桂林入口，麵質細滑柔韌，口味正宗。店主說最佳食法是乾撈，煮得軟硬適中的米粉，加入酸筍、酸豆角、花生、葱花等配料，再淋上以羅漢果等百多種材料熬成的滷水汁同吃就最滋味不過。其中牛腩和鍋燒撈麵最受歡迎，前者利用滷水和大量藥材烹調，肉香濃郁；後者燒得香脆的豬皮，連着少許脂肪，油香得宜。

查詢電話：3487 3788

三燒桂林米粉$24 三燒包括鍋燒、用藥材煮的牛肉和廣東叉燒，組合特別。

牛腩桂林米粉$24 米粉煙韌彈牙，味道香濃，好味！

泰：泰式豬手撈 香滑不膩

傳統泰式撈麵不易找，位於九龍城的「泰國路邊街美食」就有得食。招牌豬手撈麵選用來自泰國的麵條，質感比廣東蛋麵煙韌，即使放久了依然有嚼勁；主菜豬手則先用上秘製滷水汁燜至柔軟入味後起骨切件，搭上芽菜、花生碎、冬菜和葱花同吃。泰籍華裔老闆娘話泰式撈麵傳統不加汁料調味，不過也可按個人口味加入適量白醋、魚露、白砂糖或辣椒粉伴吃，同樣有風味。

查詢電話：2716 3868

豬手撈麵$30 豬手入味，表皮油潤香滑而不覺肥膩，本地食家也經常幫襯。

麵質超彈牙，滷水汁濃得來不太鹹，豬手又夠入味，連芽菜都咁爽脆，配料、湯汁與麵條好配合，好好食！

印：印尼牛肉撈 足料惹味

傳統印尼撈麵以油麵為主，做法與廣式撈麵大同小異，但對配料非常講究。數到最特色的要算巴東牛肉撈油麵，味濃帶辛辣，「馬來．棧」特別加入椰汁、香茅等多種香料烹調醬汁，用來伴麵一流。而伴碟的青瓜是選用當地常見的「刺青」，質感爽脆，滲出淡淡清甜。在保留傳統之餘亦有改良，除了油麵，可改配公仔麵或米線，中溝印的味道原來咁好。

查詢電話：2321 0100

巴東牛肉撈油麵$42 牛肉落足香料製作，是印尼名菜。	咖喱牛脷撈公仔麵$38 醬汁椰香味較重，香辣兼備，伴公仔麵搭配不錯。	咖喱雖然不太辣，但香味十足，伴碟的薯仔炸過後再分開用醬汁煮，非常入味。巴東牛肉的肉汁完全滲入麵中！

撰文：英美茵

攝影：陳世昌　

化妝：Emma

髮型：John@Avena