楊怡憑《宮心計》姚金鈴一角，奸出成績，躍升為今屆《萬千星輝頒獎典禮》「最佳女主角」大熱之一，有望進身視后的她，昨日試戴總值一千五百萬元的名貴首飾，務求頒獎禮當晚以最雍容華貴姿態示人。
楊怡昨日穿上一襲低胸間條短裙，親臨尖沙咀英皇珠寶旗艦店，試戴三套總值達一千五百萬元的名貴首飾，她對三套首飾均愛不釋手，她說：「我鍾意紅寶嗰套（Flaming系列，總值逾四百萬元），自己鍾意簡單嘅款式，想揀啲靚同特別嘅出席頒獎禮。（唔着埋套戰衣出嚟試效果？）唔得！套戰衣已經喺我心裏面，我襯得到。（買首飾獎勵自己？）都好喎，唔知有冇折呢？又冇男仔送畀我，蝕呀！第時男仔向我求婚，我要一百卡鑽石，我唔怕會嚇走追求者，佢會買得起，女人貪心係啱o架！」
阿媽見到自己忟憎
楊怡分享完貪心想法，又自爆粗心瘀事，她說：「我拍《家好月圓》時，李司棋借咗隻戒指畀我，點知我整唔見，司棋姐好淡定，我就慌到喊。（驚賠唔起？）我驚整唔見人啲嘢，好在後尾喺衫袋搵番。我試過洗手除戒指，結果搵唔番，隻戒指唔算名貴，但就好鍾意，所以我決定頒獎禮嗰晚唔去洗手間o架喇！」
楊怡對於有報道將《宮》劇結局逐格睇，她說：「都係時候煲起個劇，呢輪出街好多人問我報道寫嘅劇情係咪真？但我要保持神秘感，所以唔會答，佢哋係都要問我求證，咁多人關心劇情都開心嘅。有時見到媽咪睇《宮》劇，見到我就好忟憎，我知道佢想鬧我，但又唔可以，感覺好得意。」
殺鄭太妃嫁禍三好
至於《宮》劇的結局篇，姚金鈴（楊怡）除拉攏馬元贄（李國麟）朋比為奸，又私審阮翠雲（關菊英），殺死鄭太妃（韓瑪利），再嫁禍劉三好（佘詩曼），奸相盡現。
此外，英皇鐘錶珠寶將再度與世界頂級鐘錶百達翡麗合作，分別於十二月三日至七日於尖沙咀廣東道八號店、十二月十日至十五日於銅鑼灣羅素街五十號店，舉行兩場「百達翡麗展覽」，共展出六十九隻名貴手錶，總值逾二千萬元，屆時老闆楊受成、英皇鐘錶珠寶董事總經理楊諾思及多位財經界名人均會出席。
文：影視組