黎明嫂樂基兒（Gaile）為I.T旗下的自家品牌獻出婚後的第一次，擔任時裝設計師推出b+ab by Gaile系列，Gaile因壓力大搞到失眠！不過愛試新事物的Gaile更有意思推出烹飪書踩入飲食界。
樂基兒：G 記者：記
G：要做一個真正嘅設計師，要諗做乜嘢其實好難，五月份要做定十二月嘅衫，呢啲經驗從未試過，I.T教識我好多。
記：設計期間有冇遇到困難？
G：之前設計一件皮草，諗嘅時候個款幾靚，但着出嚟好似馬騮咁，件衫好短，唔易着，搞到我幾晚瞓唔到，後來將個款改得簡單啲，easy to wear啲。
記：係咪達成做設計師嘅心願？
G：我冇諗過有冇機會繼續做設計，我係一個好易滿足嘅人，一樣嘢已經做到就夠，以後係咪再做再發展呢？冇諗。
百分百滿足
記：有可能係最後一個設計？
G：有可能。我鍾意試新嘢，關於自己鍾意嘅嘢都想試，例如飲食或者藝術。
記：但你好有設計天分！
G：多謝！我唔鍾意畀太多壓力自己，將來咁啱再有時間會試吓，做一個設計師唔易，好似揀布都用咗五個鐘，要做六個月後衫褲嘅trend，要計資金夠唔夠，希望下次可以諗到一年後嘅trend。
記：設計帶畀你滿足感？
G：有，好開心，滿足感有100分，用到以前學過嘅嘢，我返學時曾經學過用十種方法畫畫，我就係用咗呢個format去做衫。睇男人着衫，再做一個女仔嘅版本，出嚟效果好唔好冇所謂，試過try my best已經係完成我嘅工作。
Leon讚OK
記：Leon鍾意你着乜？
G：Tee和牛仔褲，佢都想人着得舒服，佢冇乜所謂，唯一係驚我啲鞋太高踭行唔到。我問過好多男仔，佢哋都鍾意睇女仔個樣，女仔性感啲可以但唔使騷胸。
記：Leon有冇睇過你嘅設計？
G：佢睇過雜誌報紙登出嚟嘅相，覺得OK，幾好。
自評得70分
記：評下自己嘅設計值幾多分？
G：70分，仲有30分改善空間，希望可以再夠膽去設計。今次我冇用喱士，如果再做冬天衫嘅話，我希望用白色。我喺唔同季節會變咗第二個人，夏天和冬天係兩個人，夏天sweet啲，冬天cool啲，只係外形上唔同，始終我都好nice嘅。
記：做過設計師後，下一步你想做乜？
G：有機會想出cook book，一本有齊中西菜式，泰菜越菜都有。
Party Wear玩極端
由名模樂基兒（Gaile）主理的b+ab by Gaile系列，以Party Wear為設計骨幹，將CRYSTALLIZEDTM-Swarovski Elements融入其中，為Gaile的設計增值，走中高檔路線。
Gaile的設計是將Hi-end和Street chic兩種極端風格共冶一爐，用料矜貴，手工細緻，款式卻相當生活化，更能凸顯設計的實用性！為配合秋冬季節，色調以穩陣的冷色為主，包括黑色和灰色。例如一件孖襟款式的絨褸，右肩膊位飾有以水晶拼湊成的蠍子貼花，而這顆貼花更是以魔術貼黐上，Attachable設計盡顯Gaile細密的心思。
Party Wear的設計，Gaile講究Bling Bling效果，除了發揮自己的畫畫功力，設計Neon霓虹色調煙花（Firework）圖案外，更大量運用CRYSTALLIZEDTM-Swarovski Elements的水晶，用作拼貼領呔圖案營造Trompe l'oeil效果，以及善用點綴針織過頭笠的領緣，營造閃爍效果。
採訪：梁翠儀、吳靜嫻
攝影：黎志輝、司徒國榮
示範：Anna G.
化妝及髮型：Shirley@meggyli.com