好多電影同名遊戲因要兼顧角色同表達電影內容而犧牲遊戲性，玩落好冇癮。但係《Avatar》就絕對唔同，係史上第一隻同電影同步開發的遊戲，甚至連大導占士金馬倫都抽時間走去遊戲工作室搵拍戲靈感，將遊戲元素放入電影。遊戲仲支援3D顯示，下年配埋3D電視就Perfect！

首度對應3D顯示

電影打正旗號係第一套用3D拍攝的電影，遊戲版亦唔例外，仲設有3D顯示選項。大家可能會話未有3D電視賣，得物無所用，不過明年就會有，今年打爆一次，下年買新電視後又可以翻煲；如果大家已擁有3D電腦芒，就可以率先感受3D效果。遊戲版畫面的確好有水準，無論星球場景同出場的奇異生物都相當繽紛奪目，冇辜負大導一番心血。

打造新劇本

《Avatar》背景設定在未來的潘朵拉星球，人類為方便取得星球資源，將人類DNA同Na'vi人DNA溝埋，培養出身高3米的藍血人阿凡達（Avatar），大家可以在遊戲中因應唔同關卡而扮演人類士兵或阿凡達出戰，感受唔同種族的處境，體驗人性掙扎，到底係仍然扮演人類臥底抑或轉個頭幫番Na'Vi人？遊戲版時空比電影版早兩年，劇本為重新編寫，可以話係幫電影解畫、互相補充。

人類、阿凡達 各有玩法

至於《Avatar》遊戲玩法，主要靠主角拎住武器打怪獸兼完成大大小小的任務。人類士兵同阿凡達的武器好唔同，人類可以用唔同槍械，至於變身阿凡達後，武器就變為弓箭類，而且需要跳來跳去，玩落同做人類係兩種味道。玩法唔係齋射、齋避咁單調，好似做人類士兵時可以在有限時間內隱形、補給或者啟動電磁場彈開怪獸。遊戲設有超過60種RDA或者Na'Vi人武器，而且每個種族都有20種唔同技能可以學習，到遊戲中後段仲會畀大家選擇投靠人類抑或Na'Vi陣營，改寫電影故事！

遊戲資料

類型：動作射擊

開發：Ubisoft

平台：Xbox 360、PS3

推出日期：12月3日

售價：$329（Xbox 360）、$389（PS3）

查詢電話：2725 3338

撰文、部分攝影：布偉倫