Hot Toys近年很喜歡製作冷門角色，先是《火星人襲地球》，後是《幽靈刺客》，雖然香港Fans唔多，但外國就好受歡迎。日前《Watchmen》內的Comedian（中譯笑臉俠）亦被「12吋化」，忠於原著臉露誇張笑容，表情被玩家激讚，好過常見的「木獨男」多多聲！

面相八成似

12吋Figure一向都木無表情，型是有型，但就限制了情景拍攝的主題。這款笑臉俠之前DC Direc出過，但樣貌身材都唔似，完全是濫竽充數作品。今次改由HT出品，大師Yulli負責頭雕，JC Hong主力上色，角色神髓完全被還原過來，不但皺紋、鬚根、雙下巴清晰可見，就連牙縫位及嘴旁笑紋也照顧到，外觀比自家製Silk Specture Ⅱ還要神似。

武器一覽，有刀有槍有手榴彈。

採用了包膠Body，但上身似乎還未夠大隻。

武器多多

素體沿用12吋Slim Body，而為免關節位「穿崩」，上身經過包膠，肌肉感猶在，只是關節位數量減至21個，冇其他Action Figure咁靈活。跟電影一樣，Figure穿上緊身背心及皮褲，雙手亦戴上護膊及護肘，前者亦有舊化感，總算交足功課。武器方面，有齊霰彈槍、榴彈炮、手槍及刀仔，並提供一條可放16粒榴彈的子彈帶，大可放到其他軍事模型上使用。特別一提，HT下一個目標是面譜俠，鍾意《Watchmen》的話就要密切留意！

角色鍾意擔番口大雪茄，Figure當然食唔到，但就可把雪茄夾於兩指之間。	HT沒有攞到「哈哈笑」Logo版權，所以襟章要留白，Fans要自行加工了。	背心用橡膠總算適合，但連下身都用便有點奇怪，若用仿真皮會更好。
皮鞋度身訂造，可插刀仔。	多送一對手掌及活動地台。	護膊有花痕，增強舊化感。

撰文︰陳志滔

攝影︰郭凱敏

查詢電話︰2388 4677