何琍琍與趙世光第三千金趙式平，將於下月與法籍男友Frederic拉埋天窗，在浪漫的花都舉行婚禮，宴請三百親友出席。一向鍾意小朋友的式平，直言婚後一定會生小朋友！

何琍琍與趙世光今年喜事重重，一對孖女趙式和及趙式平，大孖式和今年年頭結婚，細孖式平亦將於年尾下嫁法籍男友。趙式平與拍拖兩年的男友Frederic，將於12月12日在巴黎舉行婚禮。式平透露男友在六月時求婚：「六月時佢媽咪生日，我同佢一齊去法國，有次行街喺海邊位置佢就同我求婚。（有冇跪地送花？）花就冇，有攞住戒指跪地求婚，佢前一日送咗一大紮花畀我，嗰時已覺得怪怪哋。（請幾多人？）三百幾個，應該有百幾個專程飛過去。（喺香港補擺酒？）唔會，最close嘅朋友已飛咗過去。」

孖生姐姐式和剛於年頭出嫁，式平亦沾上「喜氣」，於年尾跟男友完婚。（資料圖片）

何琍琍、趙世光

親自構思請柬

式平表示今次親自與設計師構思婚禮的請柬：「好多時收到香港嘅請柬覺好boring，好多用電腦整出嚟，冇乜特別，婚禮係人生大事，我想畀人見到自己嘅誠意，最直接就喺請柬度睇到，所以要做到unique，我同設計師一齊諗點樣做，之後佢親手畫，一生人得一次唔可以咁求其。」

式平與Frederic現均在上海工作，而婚後二人依然會在當地居住，她說：「我哋都係會喺上海，可能五到十年後搬返法國。（想唔想生小朋友？）都會想，隨時都OK。（有咗先結婚？）梗係唔係，我結婚都籌備咗半年囉。」式平婚後會即時與男友到非洲度蜜月，她表示：「我哋兩個好多地方都去過，今次去非洲想體驗特別嘅生活。」

式平請來名畫師設計請柬，為婚禮落足心思。

放大圖片

文：名人組