陳豪為拍劇激減30磅，更傳出疑似「鬼剃頭」，為此緋聞女友廖碧兒（Bernice）亦忍不住開聲「投訴」他唔健康，直指男人太瘦唔好攬，軟硬兼施勸陳豪增磅。

昨日Bernice出席「閃爍水晶時裝匯演」，示範兩件PRO CAM-FIS Crystal Line水晶羽絨，大會即場將她穿過的兩件羽絨拍賣，其中一件更附有她的簽名，她笑言希望投得羽絨的人成日會掛住她。兩件羽絨最後分別以$2688及$2988成交，品牌將賣得的價錢集合其他善款，將總數共三萬元撥捐國際小母牛香港分會作慈善用途。

直言恨生BB的Bernice，對住小模特兒即笑得開懷。

陳豪

要小心身體

問Bernice會否送羽絨給陳豪時，她即「借題發揮」說：「畀佢着都冇用，佢太瘦啦，咁嘅天氣咁瘦好易病，我就瘦得健康，佢要拍好多外景，要小心身體。（送件簽咗名嘅羽絨畀佢，等佢掛住你？）要簽就要加錢，男士大隻啲好啲，攬住可以攬得晒，同埋warm啲，（佢攬你唔夠warm？）唔知呀，都冇攬過我，其實我係代表一般女仔嘅心得嚟講。」她又笑言不擔心對方太瘦，令自己變相看來大件，更指着自己胸前說：「我呢啲叫做有身材，唔同嘅。」

廖碧兒晒頸巾上的水晶。

品牌將Bernice示範過的兩件羽絨作義賣，總數撥捐小母牛。

切磋變切菜

Bernice興奮透露聖誕期間將會拍電影《葉問前傳》，飾演一名打女，期望從中學到功夫。現場所見，她對同台演出的幾名小模特兒又攬又抱，認真恨死陳豪。Bernice大讚小朋友好真，更自爆在後台時將「切磋」說成「切菜」，被小朋友取笑。她又直言恨生BB，但認為現在不是適當時候。

文：名人組