以前小記每向朋友提議郊遊，個個都耍手擰頭，話遠足、觀鳥、植樹、野餐等活動悶到極點，都唔知有乜好玩！不過今時今日「郊遊」已經有全新定義，可以飛車、爬艇、玩水上大滾筒，仲有得燒嘢食。血氣方剛的朋友們當然聽到蠢蠢欲試，原來親親大自然，都可以好刺激！

花草間 駕車馳騁

香港現時有40%土地被劃為郊野公園，一向都是大家遠足郊遊的熱門地點，但最近興起將新界部分農地改作康樂用途，位於上水的「塱原濕地農莊」在河上鄉居石侯公祠附近，在上水港鐵站乘K51小巴眨吓眼就到，面積約6個足球場般大的農莊，仍保留部分農地、魚塘，種着花草、養着魚，看起來綠草如茵，與一般郊外地區無異，然而這裏比一般郊區多設近10種水陸玩意，其中越野電動車全港少有，以電池推動的越野車易於控制，不懂駕車人士亦能輕易在田野窄路馳騁，嗅着青草味來享受駕駛的快感。

炒車破壞環境！	慢駛熟習操作	農莊育有幾頭黑草羊，樣貌趣致，最年幼的都已有兩歲，遊人可隔着圍欄餵牠們吃草。餵飼用草 $5/紮

水陸玩意 刺激兼消脂

農莊的水陸玩意，刺激程度有別，有「炒（越野電動）車」恐懼症之人士，大可嘗試腳踏車、機械馬車等玩意，輕度刺激卻頗為費力，玩玩吓可能仲有消脂功效！尤其農莊設有5個燒烤棚，共10數個燒烤爐供應BBQ任食4小時，食到飽飽滯滯就玩騎馬機，話咁快就幫你消脂。想全身運動兼訓練手腳協調？農莊更有水上滾筒、手搖艇及「農吐珠」草地滾球，刺激度亦倍增。

燒烤棚旁邊有魚塘美景，空氣清新，倍覺心曠神怡；食物選擇有大路的雞翼、扒類，款款都醃得入味。	騎機械馬仔的動作，像極瘦身用的騎馬機，運用大腿和小腿肌肉，控制馬仔前進。$30/15分鐘	負責人稱甩尾機械車乃全港獨有，前進時突然轉向，就能體驗如「拓海」般的飄移感覺。$30/15分鐘
身處水滾筒中不斷奔跑以游走池中，如果你有養倉鼠的話，你一定會玩得好有體會。$30/10分鐘	農莊最新引入的成人手搖艇，以左右手轉動齒輪控制，不協調的話，艇仔就會原地氹氹轉。$30/30分鐘	「農吐珠」源自新西蘭「Zorb Ball」，現改在平地上滾動，玩法亦能靈活多變。$30/5分鐘

塱原濕地農莊

開放時間：11:00am~8:00pm（平日）

10:00am~8:00pm（假日，燒烤場開放至12:00am）

燒烤收費：成人$68、小童（身高1.2米以下）$58（平日）

成人$78、小童$68（假日）

網址：elekart.hk

查詢：2791 7046

撰文：陳嘉勵

攝影：黎劍華

模特兒：Hugo、So Ling、張瑩靜（Hill Production）

查詢電話：2791 7046