上年彈出一隻《Left 4 Dead》，一年賣300萬套，靠的竟然是4條友合作諗計打喪屍。來到第2集，喪屍大佬、版圖設定和AI智能更強，但人都係死剩4個，怕唔夠打？好彩加入新Mode，上網打可以做喪屍，反圍剿人類！

電鋸斧頭 劈到手軟

上集《Left 4 Dead》武器少得出奇，一遇到大佬或者驚嚇位，實被班喪屍撲埋來抽水，因此今集加入超過20種新武器，包括全新肉搏系斧頭、煎鍋和球棍等，換彈有喪屍埋身都可以轉武器頂住，而且電鋸和武士刀威力仲唔弱，一下可劈開幾件，被圍時保命必備。

合作對戰 玩法多變

《Left 4 Dead 2》備有單機加連線模式，單人玩時電腦會自動填滿其餘3個角色，你拎起斧頭埋身衝殺，隊友會醒目用機槍，當你唔夠血時仲會給救護包你食，但敵人AI和攻擊同樣變強，好似識得噴毒口水、用脷遠距箍頸等。

玩玩吓發覺有些關卡仲有NPC未死，好似行過槍械店發覺鎖死咗，原來老闆驚到唔敢開門，要夾手夾腳到超巿運盤可樂過來，先肯開門補給彈藥，當做小任務都幾好玩。

生存模式 鬥撐得耐

除了單機和連線合作外，今集最過癮是加入生存模式，守在補給站等喪屍四方八面湧埋嚟，炸完一堆卒仔又跳幾隻大佬來，殺得大佬又無暇換彈補血，捱到4分鐘經已有獎牌，簡直是挑戰自己極限。上網還可揀清道夫模式和對抗賽，有得4打4分別扮演人類和喪屍，鬥快殺清對手， 好刺激！

撰文：鍾鎮科