楊怡甘願為「視后」大熱的鄧萃雯陪跑，不過，身為前輩的雯女，卻對楊怡這位新一代花旦相當「肉緊」，坦言曾被對方的真情眼淚所感動。「真，係演員最值錢嘅地方，靚，只係其次！」雯女娓娓道出演員魅力之層次和箇中道理。

「我一直有留意楊怡，我睇過佢喺《溏心風暴之家好月圓》演「攞女」嘅角色，佢有一場戲係要喊，我好感動，覺得佢唔係假喊，一個演員係要感情豐富，才可帶動觀眾嘅情緒，咁樣先至夠touching，其實，演員最有魅力係真性情嘅表現，呢樣係最值錢，其次先至係靚，觀眾唔投入睇你演出，才會挑剔個演員靚唔靚，所以，我覺得真情演繹係最重要。」

其實，楊怡今次演奸角，自覺是一項大挑戰，要觀摩好多前輩演法，不過，雯女卻有另一套睇法，她覺得演任何角色，都不用太多計算、考慮。「扮忠扮奸都唔重要，講到底都係『真』，有時以為演奸角，要用行為、眼神去交代，當你以為好突出，其實就阻礙了本身嘅發揮，我演戲咁耐，到依家都有失手時候，因為一個演員，的而且確有好大包袱，我都有，每一次都要平衡。」