在劇集《宮心計》中首次飾演奸角的楊怡，被追捧成為「視后」之選，與佘詩曼（阿佘）、鄧萃雯（雯女）睇齊，不過楊怡自感演技尚有進步空間，認為雯女才是封后人選，自己甘願作陪跑。
楊怡在台慶重頭劇《宮心計》中飾演姚金鈴一角，為求上位不擇手段，而現實中的楊怡卻無欲無求，未如金鈴般野心勃勃，縱使傳言無綫今年安排她與金蘭姊妹阿佘在《宮》孖住上造勢「夾擊」雯女，造就楊怡為今年頒獎禮「視后」大熱人選之一，不過，楊怡自感未係時候登位，認為自己可以繼續進步。
四奶奶實至名歸
楊怡說：「我從來未有打算要憑金鈴這角色成為『視后』，可以入圍競逐，已經好高興，啲人成日問我想唔想攞獎，其實邊有人唔想攞獎，因為獎項代表鼓勵，不過今次我可以入圍已經好開心，攞獎仲未係時候，仲有進步空間，我心中反而支持雯女攞獎，因為佢真係演得好好，佢嘅演技、經驗都好過我，所以雯女攞獎係實至名歸，我睇過佢喺《金枝慾孽》演如妃的角色，演得好有層次，而《巾幗梟雄》演四奶奶又口碑咁好。其實，雯女演戲好生活化，好自然，好似我睇佢套《師奶唔易做》，佢嘅師奶造型，活靈活現。」
奸人唔易做 眼神被考起
楊怡對雯女演出，讚不絕口，對於自己在《宮心計》的表現，卻大呻「奸人好難做」。無獎攞都一樣開心，楊怡最在乎的，是自己演技是否有進步，今次初試演奸角，對她而言已經是突破和挑戰。楊怡為演好金鈴這個「奸角」，事前做了不少準備工夫。
她說：「其實，演奸角好難，我諗番喺《宮心計》一場用眼神交代嘅戲，真係唔易表達，所以，奸人比好人難演好多，當知道要演奸角，我就留意米雪、菊姐（關菊英）之前的演出，其實奸係一個好深嘅學問，希望自己的表現是奸在骨子裏。奸角中，我好欣賞郭晉安，佢平時個樣好乖仔，但係一做奸角，個樣就好反骨，做番忠角又予人好正直感覺，而羅嘉良喺《富貴門》都奸，但我唔會同佢哋比較，因為個個都係前輩，自己係後輩，唔敢比。」
文：影視組
鞋：Steve Madden
服裝：Mimosa
髮型：TY
化妝：Marsha Ma@A&V Make up School
場地：馬泰（奧海城）