南華同英超熱刺結盟，港版「C7」陳肇麒（在南華及港隊都穿上7號球衣）將於下月起程去熱刺跟操，跟操表現好的話仲有機會試腳同簽約，身為香港球迷當然好興奮！港版「C7」一個月時間可以點樣強化自己？就等小記提議幾個方法，大家一齊為「C7」打氣啦！
亞洲球員企穩歐洲頂級聯賽
早幾年亞洲球員登陸歐洲頂級聯賽，多數充當「球衣模特兒」，最大作用係「吸水」。而近年亞洲球員到歐洲落班，戰鬥力大大提高，當中唔少都可在歐洲頂級聯賽立足，祝願港版「C7」能夠跟操成功啦！
朴智星
首名出戰歐聯決賽的亞洲球員，體力超強。
國 籍：韓國
年 齡：28歲
位 置：中場
現効力球會：英超曼聯
李青龍
今季加盟保頓，至今已取得兩個英超入球。
國 籍：韓國
年 齡：21歲
位 置：前鋒
現効力球會：英超保頓
長谷部誠
以正選身份，去屆幫助禾夫斯堡奪得德甲聯賽冠軍。
國 籍：日本
年 齡：25歲
位 置：右後衞、中場
現効力球會：德甲禾夫斯堡
陳肇麒Profile
年 齡：24歲
位 置：前鋒、翼鋒
現効力球會：南華
身 高：186cm
體 重：78kg
第一招：打機鍛煉腦筋
好多世界級球星都有打足球Game，可以減壓兼鍛煉腦筋，一舉兩得。好似近期推出的兩大足球遊戲都有球員育成模式，可以扮演一個現役或創造球員，玩法同真正落場踢波差唔多，有波在腳時要諗點樣處理，冇波時要走位配合，可以訓練進攻及防守意識。
第二招：睇《一球成名》提升意志
足球Fans都應該睇過《一球成名》（Goal）呢套電影，主角Santiago Munez第一集加盟紐卡素，第二集就升呢加盟皇馬會碧咸同施丹，第三集幾時公映就未知。有睇過第一集的觀眾可能記得，主角在街場一個扭十個，但到紐卡素跟操就連波都掂唔到，呢方面真係要適應吓，唔好被打沉士氣。如果可以學主角咁堅毅不屈，跟操就有望成功！
第三招：做Gym打拳練體能
現場睇過肇麒踢波，無疑其身形夠高幾煞食，有高空優勢，亦可使出手榴彈攻勢；不過通常到下半場中段，肇麒體力下降得幾快。而睇開英超的朋友都知道，身形同體能在英超好重要，在香港的優勢未必可以在英超上發揮，所以首要條件都係練好體能，尤其比賽時身體衝撞極多，體力消耗更大，就如姚明登陸NBA後都即時日操夜操練大隻，明未？
撰文：布偉倫