成為時裝界新寵的謝婷婷昨日應Marc Jacobs邀請出席活動，以一襲背部透視的低胸連身裙亮相，隱約露出黑色胸圍，性感誘人。與安志杰沐浴愛河的婷婷，自言愛花香香水，更甜到漏地讚男友「好香」。婷婷又透露男友安排船P為她慶祝27歲生日：「叫咗啲朋友，仲有霆鋒一齊上船慶祝，阿嫂要湊仔，冇去到，但年年都有畀利是我！」至於是否因為栢芝懷孕不便上船時，婷婷代為解釋：「唔係，當時係九月。」

另外，有指婷婷取代好友鄭欣宜的廣告代言人地位，她說：「細節仲傾緊，我唔覺得佢會唔開心，欣宜成日send短訊關心我，我哋好親密！」婷婷更強調與欣宜的友誼不會受影響。