日前謝霆鋒親證太太張栢芝再有喜，奶奶狄波拉踢爆栢芝無論佗仔佗女，都會繼續生，新抱仔如此抵錫，難怪奶奶錫到燶，與栢芝媽咪夾份煲湯水給她安胎，而謝婷婷為保栢芝私隱則封嘴不談阿嫂。

狄波拉（拉姑）前晚與女兒謝婷婷和夫婿鬍鬚Kong應邀出席溥儀1881旗艦店開幕酒會，拉姑甫到場便被大批記者追問新抱栢芝第二度懷孕的消息，將做第二任嫲嫲的拉姑難掩喜悅之情，提到再有孫抱即笑不攏嘴，更透露與栢芝媽咪合力夾份煲湯水，她笑說：「大家夾份啦，佢媽咪又煲，我又煲，不過佢都好有經驗喇，栢芝平時唔食肉，但知道要吸取唔同營養，所以依家都有食！」至於有指栢芝懷有雙胞胎，拉姑坦言沒正式向新抱求證，但就覺得「唔係好似」，更踢爆栢芝會密密生：「係仔佢又會再生，係女佢又會再生，所以冇所謂，樣樣都開心，而且新抱仔好鍾意小朋友，兩個佢都唔夠！」

栢芝與母親感情甚佳，難怪栢芝媽爭煲安胎湯水予愛女飲用。（資料圖片）	狄波拉夫婦與謝婷婷出席溥儀1881旗艦店開幕酒會。	狄波拉踢爆栢芝打算再懷第三胎，故今胎不論男女她都開心。

愛留家「安胎」

談到栢芝的身體狀況，拉姑心痛地說：「佢呢胎嘔得好辛苦，又要湊個仔返學放學，（叫栢芝唔好出街？）除咗湊仔返學放學，基本上佢都同霆鋒都成日匿埋喺屋企。」看來深閨的栢芝時常留家安胎。

有份為Custo Barcelona行騷的周汶錡（左），以鬼馬表情摸摸趙嘉懿微隆的腹部。	周汶錡（左）換上性感tube dress與孫麗婷齊齊行騷。	鍾楚紅揚言最愛戴太陽眼鏡出街。

同場的鍾楚紅則專程捧好友邱楊寶春的兒子邱子傑場，她表示極愛戴眼鏡，更鬼馬地說：「我冇戴眼鏡就好似冇着衫咁，（但你今日冇戴眼鏡喎？）夜晚嘛，我係講太陽眼鏡。」言畢即被保安護送離開。

鄭希怡（左起）、設計師Custo Dalmau和袁彩雲在會上合照。

一眾名人難得於溥儀1881酒會上碰頭。

婷婷拒講阿嫂

另邊廂，一日走兩場的謝婷婷，前日更為時裝品牌Custo Barcelona示範秋冬09-10新裝，對於證實栢芝有喜，自言講得太多的婷婷即刻意封嘴，她解釋：「阿嫂都係娛樂人，由佢出嚟自己講。上次問我阿嫂係咪有咗，我話冇，之後公布話有，費事答唔係事實嘅答案。」婷婷更笑言可給狗仔隊「做嘢」的機會。問她會否羨幕栢芝結婚生仔？婷婷認為生BB壓力大，現時以工作為重，與男友安志杰努力賺錢，被問到入行後有否延遲結婚生仔的人生計劃時，她說：「工作唔應該影響私人生活，尤其係結婚生仔！我會平衡，依家要搏命搵錢，安志杰都努力緊，我哋唔急。」

另外，首次懷孕的模特兒趙嘉懿（Carrie）亦有份行騷，她說：「有咗三個月，暫時繼續工作搵多啲奶粉錢，大肚行騷酬勞高啲。」

文：名人組