吃一頓令人回味無窮的飯，不等於是品嘗黑松露或呷啖陳年醇厚的紅酒，即使簡單的食材，一顆豆一粒米，呷着魚湯上厚厚的油，當中的人情味就如湯油一樣，濃情化不開，葉澍堃說，安徽之行他便吃過這樣一頓最美味的飯。而李小鵬則愛心大發，教小朋友做體操。

身為國際小母牛香港分會董事局成員的葉澍堃，早前帶同愛妻聯同董事局主席梁錦松、小母牛愛心大使伏明霞及中國國家體操隊金牌得主李小鵬，親到安徽探訪。葉澍堃坦言以往做官時，根本無時間去做探訪，此行令他感受至深。

買豬肉宴客

「當地人民一年只有兩千蚊收入，其中一戶姓李嘅男戶主患有肝炎，女戶主就有類風濕，兩人藥費每年加埋都要五千蚊。小母牛送黑豬同埋教佢哋改良飼養方法。」葉澍堃說。此行更獲戶主熱情招呼，「佢仲託人買豬肉番嚟，要知道豬肉對佢哋係好珍貴，一年先食一兩次。我同老婆即席下廚，我炮製一味鹹魚炒蛋，戶主話未食過。」他續說離開時大家都依依不捨，更獲對方送贈南瓜。「雖然我哋萍水相逢，但都將佢哋僅有嘅送畀我哋。」

好味農家菜

轉到另一條村探訪的葉澍堃，說最深刻是踏入屋內，可以「家徒四壁」來形容。「得兩張毛主席同『好日子』嘅海報，可見佢哋嘅願望想每天有好日子。」戶主更從水庫捉了一條三斤重的鰱魚做餸。「將魚切塊再用豬肉同薑爆香，再用水煮，雖然湯有好多油，但我都攞嚟送飯，仲破例食咗兩大碗白飯！同兩家首次見面嘅戶主食飯，可以話係我同太太覺得最好味嘅農家菜，當中無比嘅人情味同溫暖，永遠難忘。」

另外，李小鵬說看到貧民的困難時，心情激動。「有個小孩雖然是十三歲，但因營養不足，個子黑黑小小。我教他們做雙臂打圈的舒展活動，不過他們一時跟不上，就像游水般胡亂打圈，十分有趣。國家悉心栽培我哋，應該好好回報，有能力就要積極參與公益活動。」

文：名人組