真心的，我覺得人與人之間的溝通合作，最緊要是互相尊重，日前為一個藝人做形象，我覺得跟我的形象團隊受到極之不尊重的對待！唔係個星不尊重我們，我跟大家說，其實我做過的大部分明星，都非常之尊重形象師，不懂得尊重我們的，通常都是……請容許我粗俗一點講：二打六！

認真的，三九唔識七，行埋嚟，望都唔望你一眼，即刻喺度亂咁摷啲衫，摷都算啦！最嬲是你整皺晒啲衫！個樣仲要好似嫌三嫌四、藐嘴藐舌咁走咗去，我想問吓你：知唔知咩叫尊重？尊重人之外，請你尊重人家的專業！其實去到依家，我都唔知呢個二打六係乜水叫咩名，因為佢連自我介紹都唔識！你話啦！我係咪應該嬲先？

講真，大家一齊做嘢，都係為咗件事啫，搞掂囉，咪大家一齊收工鬆口氣囉，都無人話要你好好禮貌，唔該前唔該後，不過，你連最基本的互相尊重都唔識，咁就真係有點兒那過囉！其實我跟我的團隊都算平易近人，比你個二打六搞亂檔之後，我們都沒有出任何聲，還報以微笑！認真的，我希望呢位二打六，有一日會醒覺或者學會尊重身邊的人，衷心的。

時裝設計師