俗語有云「買賣兼睇相」、「低頭切肉，把眼看人」，街邊小販，也懂得察言觀色，眼看你「眉精眼企，食飯幾味」，當然不敢搵笨，但見人「薯頭薯腦、成個懵佬」，就會出蠱惑，次貨滯銷貨硬銷。

面相分兩種，一種是與生俱來，眼、耳、口、鼻、眉、額，這些是硬件，大小輪廓已由遺傳因子決定，是命。另一種是運，也即是氣色，因個人際遇、健康、心情、心術而定。「好命有個相」，這是先天相，「失運有個樣」，這是後天相。而相好而氣色差，有命無運，難成大事。而相差而氣色好，反而可以有暫時的好景。所以，面相與氣色相輔相成，睇相遇着好師傅，一生睇一次已足夠。氣色則要日日睇，讀者看官會問：日日睇氣色豈不是要花很多錢？方向宇告訴你，不用花一分錢，只要你日日睇本報本欄，很容易就會掌握帶眼識人的正確方法。其實，睇氣色最好自己來，因為氣色的流露，是早上起床未洗臉、化妝之前，試問誰肯這樣以「真面目」示人？等到你搽好胭脂水粉，人造色素已掩蓋真正的吉凶氣色，功力稍淺的相士，如何看出真相？

方向宇