Apple宣布唔再玩MacWorld Expo，所以提早在10月尾舉行發布會，搶年底消費旺季。今次一口氣將iMac、MacBook及Mac mini同時升級，照理27吋巨芒iMac可以搶盡風頭，但好可惜畀機身細過隻手掌的新Magic Mouse滑鼠搶晒鏡！

Magic Mouse首玩Multi-Touch

Magic Mouse設計比上一代的Mighty Mouse更簡約，連一粒掣都搵唔到，原來整個滑鼠表面就是一塊Multi-Touch觸控區！除了可以做到基本的Left Click同Right Click外，只要在中間位置向上向下推，就可做到捲軸功能；打圈就可以作多方向捲軸；如向左或向右橫掃，即可向後或向前翻閱網頁、相片，操作直接又簡單。想玩Magic Mouse代價唔算高，現時買新iMac就有得送，而原本iMac或Mac mini用家都只係要畀$518，不過大前提係Magic Mouse只對應Mac OS X Leopard 10.5.8或以上，如果已升級Snow Leopard的話就自然唔使煩。

在中間上下轆，就可做到捲軸功能。	用兩隻手指橫掃，就可向前或向後翻閱相片。	在鼠身中間打圈，就係自由捲動功能，最適合放大相片時逐處審視各細節。
用上兩枚2A電池就可操作Magic Mouse，採用雷射技術作定位。

27吋16:9巨iMac新登場

上一代iMac出到24吋已算大，今季新iMac玩得更大，27吋畫面認真誇張。27吋新iMac用料及擴充性能比以往提升唔少，其中畫面顯示比例由以前的16:10改為16:9，解像度更有2,560×1,440，能顯示的色域比舊24吋多60%，即場睇片、睇相，效果真係靚到飛起；另外，機身亦加入SD卡槽及Mini Display端子，提高了擴充能力。27吋iMac用上3.06GHz Intel Core 2 Duo處理器搭ATI Radeon HD 4670，如果想玩得更激，配備2.66GHz Intel Core i5四核心處理器及ATI Radeon HD 4850顯示晶片的27吋iMac開價都只是$15,488，合理。此外，「細」iMac顯示尺寸都由上代的20吋升到21.5吋，顯示解像度為1,920×1,080，同樣採用LED背燈屏幕。新iMac出機已送無線鍵盤跟新Magic Mouse，計落慳番成千銀。

新iMac機殼唔再係膠，而改用一塊過的鋁材，更省鏡。

兩款新iMac 27吋（左）跟21.5吋（右）都將顯示屏加大兼改用16:9顯示比例。售價：$12,988（27吋）售價：$9,388起（21.5吋）

MacBook升級LED背光顯示

新MacBook方面，性能同設計已經差唔多追到同樣用上13.3吋屏幕的MacBook Pro。MacBook機殼用料雖然唔係鋁而係聚碳酸酯，但就換上一體式機身設計，再升級LED背燈顯示屏以及可使用7小時的內置電池，加上機身僅重2.13kg，應可吸引到初玩Mac機的新客。

Mac mini雖然外形設計冇任何改變，但係入場費低，用四千多元就可買到部行到Mac OS X Snow Leopard的Mac機，確實抵玩。

MacBook外觀上改變唔算大，只換上更高質顯示屏加更收身的機殼。售價：$7,788

Mac mini外觀十年如一日，但內涵就與日提升。售價：$4,788起

撰文：布偉倫

攝影：胡淑儀

查詢電話：800 908 988