無論腦場砌機或連鎖店掃筆記簿，近期聽得最多就係「Windows 7」，上周末這隻被喻為Vista終結者之視窗正式開賣，單睇粉絲們通宵逼爆銅鑼灣搶購、商舖急急腳換晒7仔做生招牌，就知佢有幾吸引。小記直踩首賣現場，搶先實試街賣版「Windows 7」，並請7位Windows 7 Promo達人醒各位開「窗」7件事。

通宵等候視窗降臨

「Windows 7」上周末正式首賣，前一晚時代廣場已有幾百人打晒蛇餅，首位買家陳先生更早於24小時前通宵守候，務求以$377優惠價搶購微軟總裁簽名限量版「Windows 7 Ultimate」。而微軟更細心請來7位Windows 7 Promo達人，乘坐動感展覽館遊走旺角、沙田、灣仔、中環等地，教大家活用「Windows 7」嶄新功能，見佢開機入視窗唔使幾十秒，速度拍得住XP之餘，玩Gadgets上網仲勁過Vista，唔怪得官恩娜（Ella）都話返屋企一定會安裝啦。

首位買家陳先生幾年前Vista首賣時都係排頭位，今年前一朝已來守候。不過看來前幾年Vista是噩夢，今次Windows 7是美好回憶。

7位Windows 7 Promo達人教在場人士使用Windows 7秘技。

廠商粉絲撐新系統

當日除了幾百位粉絲和大批傳媒撐場，首賣會更以「7」為主題搞了間Windows 7 Cafe，當中包括7位日薪$7,777的Windows 7 Promo達人和7位o靚模，伴隨着勁歌熱舞快閃登場。Lenovo、Fujitsu、HP等多間電腦商，亦帶同首批預載「Windows 7」的桌面電腦和筆記簿供在場人士試玩。

HP TouchSmart桌面電腦支援輕觸屏幕，適合玩「Windows 7」的Surface觸控功能，滿足多媒體用家要求。

Windows 7盒裝備有Home Premium、Professional和Ultimate版，售價分別為$1,699、$2,599和$2,699。

7招活用 Windows 7

1 快速檢視

以往開幾個IE瀏覽器就彈幾個IE icon阻住晒，現在移隻滑鼠去工具列，就可睇到晒所有縮圖。

2 自動拍齊

想睇《東方日報》網頁又想睇《ontv》？將視窗移至邊旁就會自動拍齊，拉到頂仲識放大，並可用放大鏡局部拉大縮小。

3 一掃而空

咁多畫面阻住桌面Gadgets，按「Windows鍵 + Spacebar」便啟動Aero功能將視窗變透明，拉住視窗一掃其他窗仔更會收埋。

4 分享資源

用家可簡單自建Homegroup網絡，與家中其他「Windows 7」電腦共享多媒體檔案及打印資源。仲可以BitLocker為硬碟加密，咁就唔怕資料被盜。

5 自我修復

Ella話半夜三更遇到電腦問題，醫生朋友唔得閒幫手整，便可透過「自我修復」功能和問題錄影機，解決電腦疑難。

6 新舊兼容

有時用唔慣IE 8和Outlook新介面，又或者想裝舊版軟件，可到官網安裝XP Mode虛擬系統，這樣就算唔兼容新系統都可照用。

7 強化工具

上代都有大批Gadgets任你玩，今次連陪着大家多年的小畫家和WordPad等都大幅強化，如WordPad就似足Office可插圖分段，更加實用。

撰文：鍾鎮科

攝影：陳富權

查詢電話：2388 9600