大家別誤會，並非瑤瑤派朱古力奶，而是搖搖朱古力奶，來到羅宋湯元祖國，在尋找連當地人都激讚最正宗俄菜餐廳時，發現除了湯好味外，朱古力奶更是驚喜十足，要搖住上枱，何解？原來此飲品是用茶壺煲融整塊朱古力，因為太「杰」的關係，侍應要在食客面前搖呀搖，才可倒出來，如此動作換上瑤瑤做，會不會引起宅男騷動？

沙皇圖書館 歎正宗俄菜

Cafe Pushkin是仿沙皇圖書館而設計，當地人說在Pushkinskaya站下車行3分鐘就可找到，一個人坐莫斯科地鐵已夠晒驚，一出車站，連路牌都冇個，拿着地圖到處望，惟有邊行邊問，但路人都不願停下，果然跟傳聞中一樣Cool……

足足一小時後才遇上好心人，終於找到了！一踏入門口，門自動開了，嘩，咁先進？原來黑暗中有專人開門，走上2樓，雖是A貨圖書館，但裝飾都是由皇室手中買入，例如吊鐘、望遠鏡和紙鎮都是真品，難怪不少政客明星都愛來沾沾沙皇貴氣！餐廳有落地玻璃設計，陽光透進來，感覺很舒服，終於可以坐定定品嘗俄餐了。

Cafe Pushkin

地址：Tverskoy bul 26, Moscow

交通：乘地鐵7號線於Pushkinskaya站下車行3分鐘即達

餐廳一角的樓梯，已可見其華麗程度。	連洗手間都靚過人，洗手盤用上花花圖案。	室內燈光昏昏暗，我更愛這個設有落地玻璃的光猛房間。

朱古力奶 搖過才好味

過了一會，侍應用銀盤奉上一個茶壺，放在我面前還搖了幾下，竟然就這樣倒了杯朱古力出來！原來用上一塊朱古力融出來的奶，味道特別濃烈；羅宋湯材料豐富，非常入味，加匙酸忌廉，更富質感，這才是真正的羅宋湯嘛！招牌甜品Pushkin賣相討好，朱古力半球的外層，包住了草莓雪糕、草莓慕絲及啫喱，甘甜酸在味蕾同時爆發。

餐廳旁是其甜品分店，蛋糕款式多多，檸檬慕絲忌廉蛋糕入口微酸味道清新，蛋糕則夠鬆軟，不甜不膩；朱古力杯則以厚厚半球外層，包着軟綿綿的朱古力軟心，分量大得好像食了整排朱古力，絕對可以媲美正餐呢！

Pushkin Bakery

地址：Tverskoy bul 26 /5 , Moscow

朱古力濃度十足，沒有混入水或牛奶，是名副其實的熱朱古力，RUB195（約HK$51）。	羅宋湯滿布紅菜頭，真正羅宋湯的紅色是這樣製造出來的，很有嚼勁。RUB435（約HK$114）。	餐廳旁有售賣蛋糕的分店，大家可以在此歎甜品。
檸檬慕絲忌廉蛋糕，食到滿口忌廉，味道清新，RUB255（約HK$67）。	朱古力杯上面的半球全是朱古力，外面包着金色脆脆的糖衣，食完很滿足，RUB315（約HK$83）。

旅遊備忘

簽證：持特區護照毋須簽證可逗留30天，持BNO則須簽證，約$600

旅行團：康泰旅行社推出莫斯科、聖彼得堡 7/8天超值抵玩團（RDV07/08），逢星期一、三、五、日出發，$11,599起。查詢：2108 8888

貨幣：HK$1約兌RUB3.8

天氣：10月氣溫約4℃~8℃

特派記者：羅安琪

鳴謝：康泰旅行社