被指半年吸金520萬的周秀娜（Chrissie），被專業化妝形象指導Rick Chin睇中，繼劉嘉玲後為著名化妝品牌拍廣告，證明Chrissie又再「升呢」！Chrissie謙虛否認，笑言升到頭暈，更否認吸金之說；還表示恨與張栢芝合作恨到流晒口水。

化妝品牌Max Factor自邀請劉嘉玲作代言人後，近十年來都只起用非本地名人，在同是品牌代言人的Rick Chin力薦下，Chrissie成為品牌的「水嫩凝肌粉底液」的香港區image girl，據知酬勞有六位數字。日前Chrissie和Rick一起上陣拍攝廣告，分別以性感的Party look等多個造型示人。

Rick大讚EQ高

向來點石成金的Rick今次選中Chrissie，笑言是被對方的長腿吸引：「我認為o靚模唔係一個差嘅字眼，之前同Chrissie合作，覺得佢外在條件好，見佢面對咁多是非，表現到佢有內涵EQ高，而且佢好肯做，我好欣賞。當年哥哥張國榮都畀好多機會提攜我，我都係秉承佢嘅作風、略盡綿力。」他續說稍後自己會推出護膚品牌並邀請圈中好友合作，至於會否促成好友張栢芝及Chrissie合作，他說：「哈！我要賣個關子先，都好大機會！」

拍攝時要用風扇營造效果，吹到周秀娜狂流眼水。

Rick和周秀娜使用新產品水嫩凝肌粉底液，交換用粉底心得。

否認吸金520萬

對於繼劉嘉玲後接拍廣告，今次又再「升呢」，Chrissie笑着否認說：「哈！個個都話我升，升到我頭都暈！（酬勞有六位數字？）係公司接，我唔知有幾多，一向都鍾意呢個品牌，可以合作好開心。（傳你半年吸金520萬？）哈！大家可唔可以放過我，邊有咁多？咁傳法稅局一定唔放過我，跌520蚊就有，要搵人執番畀我，我仲係一舊石唔係金，買樓首期仲儲緊。」

提到Rick讚她有內涵，她即大玩爛Gag，「我好似月餅咁，無水無油，只有少少蛋黃，仲係單黃。（可能同栢芝合作？）好啊！直情流晒口水，我好喜歡栢芝，佢直情係雙黃，我要向佢學習。（學佢結婚生仔？）好難講，但等我磨成金先！」

文：名人組