準新娘子關心妍（Jade）人逢喜事精神爽，舉手投足均散發明亮艷光。即將在峇里島舉行婚禮的Jade，談到未婚夫楊長智（Jonas）總是一副甜絲絲，她以「命中注定」來形容兩人的愛情，誓言要好好珍惜這個絕種好男人。

Jade性格怕醜、被動，在媒人蔡一智介紹下結識未婚夫Jonas，她更深信跟Jonas的戀情是命中注定。她清楚記得與Jonas的認識當日，正是她舉行演唱會的大日子，準備出場時就見到其「真命天子」Jonas。

Jade笑說：「嗰刻趕住出場，助手攞住隻碟叫我簽名，話係阿智嘅朋友。我已經好趕，又緊張又想去廁所，突然阿智出現話要介紹個朋友畀我識，所以第一眼對佢（Jonas）冇感覺、冇印象。」原來Jonas當時不知道Jade是歌手，而Jade對Jonas是美國華僑的印象亦麻麻，她更笑說：「完全冇諗過係佢，嗰刻仲覺得佢阻碇，點知真係命中注定嫁畀佢。」

絕種好男人

Jade跟Jonas相戀三年，她以絕種好男人來形容未婚夫。Jonas對她無微不至呵護，令她甜在心頭，直言「呢啲男人真係搵唔到」。Jonas有金融才俊之稱，身家豐厚，但Jade說：「錢我自己都可以搵到，但男人愛你個心係用錢都買唔到，最唔好嘅嘢佢都受晒，好到過分咗，一年可以呃到我，但三年冇得呃，我好珍惜佢對我嘅愛。」

Jade快將升任做「楊太」，展開人生另一個階段，對於能否擔當好太太的角色，她自己亦抱懷疑，更笑指：「抆啲！」Jade表示以前在加拿大的日子，由她充當工人負責照顧哥哥，但成為歌手後身邊慣性有工作人員幫手，慢慢忽略了照顧別人的能力，加上未婚夫的悉心呵護，她想像不到做了別人太太是怎樣。Jade甜絲絲表示：「未婚夫搶晒啲嘢做，佢乜都話『等我嚟』，又話將來生咗仔後我有排做，因為佢要返工，我就要湊仔。其實佢又講得啱喎，所以我依家好好享受佢嘅照顧先。」

一生的承諾

Jade將生BB計劃定在三年後，希望先跟Jonas享受二人世界。她眼見所有媽咪級朋友每朝六時起床送仔女返學，她大呼：「好驚返學，諗起呢個情景已經怕怕。」Jade又表示生BB是一生的承諾，將來為BB她要犧牲一切，包括自由，因為她一定會親手帶大BB。三年後，會是Jade退出樂壇之時，所以她會好好把握現在工作的時間。她說：「佢（未婚夫）知我鍾意唱歌，都好支持我，既然上帝賜我一把咁嘅聲，相信會有佢嘅安排同指引。我唱歌唔再係為成績、搵錢，係希望藉住我僅有嘅知名度，做啲音樂上有意義嘅事。」

勤keep fit做靚新娘

身形弗到爆的Jade，為求做個靚靚新娘子，每星期會做三次facial，更會日日游水及跑步keep fit，又到美容院做機打造完美線條。至於飲食方面，Jade就以清淡為主，每星期只吃一餐澱粉質，其餘時間則以沙律、蔬菜及魚充飢。Jade又表示：「肚餓就會飲有氣礦泉水或低脂乳酪。」

Jade笑言未婚夫同樣貪靚，也為最後衝刺而努力操弗。她笑言：「佢想有六舊腹肌，但我諗佢最多得三舊，佢做好大量帶氧運動，都有戒口，已經瘦咗十磅，好fit喇。」

文：音樂組

攝：李柏儒

場地：C3