玩具大王蔡志明工作時認真，玩樂也認真，這方面性格同時遺傳給下一代，他的兒子蔡加讚現時負責打理KCP九龍城廣場，現年廿三歲的他自從上位後，廣場變換全新面貌，跟他一樣年輕有活力。由於蔡家一家人也愛吃甜品，向來有生意頭腦的加讚，繼在地頭開設糖果店後，最近再花三百萬投資開設新派糖水店「甜之迷（Sweetacy）」。

新店現在試業階段，前晚兩父子飯後到糖水店巡視業務，蔡志明表示做食肆最緊要衞生和新鮮，他說：「賺唔賺錢唔緊要，最緊要開心。」給加讚打了一支強心針。加讚說：「我哋成家人都好鍾意食甜品，放假會叫保鏢買好多甜品返屋企聚餐，有日大家傾開不如自己搞一間，因為我哋旗下無甜品店，間店由我一手一腳設計，成日試食搞到肥咗成五、六磅。（幾時開分店？）同爸爸講一樣，開嚟試吓。」

蔡志明最愛吃「榴槤腸粉」，加讚最愛吃甘蔗蛋糕，笑言已吃了一千個。問他會否請女友食甜品？他笑說：「有目標就請，不過等爸爸畀少啲嘢我做先。」