美國流行音樂女王麥當娜全新精選大碟《CELEBRATION》剛剛推出，最近就忙於四出宣傳。娜姐接受訪問時大講結束世界巡迴演唱後的展望，她直言想再做導演，並有意在非洲興建女子學校，為貧童謀福利！

麥：麥當娜　記：記者

記：《CELEBRATION》係你第三張精選碟，但你係啲唔會睇番以前嘅人，係唔係？

麥：冇錯。不過我都好開心，因為啲fans鍾意聽番我嘅舊歌，我都寫過好多好歌㗎！

記：自己有冇聽番啲舊歌？

麥：（笑）我嘗試唔去聽！早排開騷都有唱舊歌，好耐無聽過，實在係好開心。 有時我會諗「啲歌真係好好聽喎」。

記：邊隻舊歌聽後仲覺得好好？

麥：好鍾意《Beautiful Stranger》。

記：咁有咩歌你係覺得唔應該為之而慶祝（celebrate）？

麥：冇！所有歌都係我嘅一部分，就算唔係大hit，那些歌都會令我想起當時人生中發生嘅事。

愛電子音樂

記：有冇一首你覺得係完美嘅歌曲？

麥：《Don't Tell Me》、《Like It or Not》及《Live to Tell》都令我產生共鳴同感到真摯。

記：你係咪啲鍾意坐喺度咩都唔做嘅女人？

麥：絕對唔係！尤其是工作同湊仔女嗰時。

記：咁空閒時候愛聽咩歌？依家仲有冇去蒲club？

麥：我聽好多電子音樂。至於蒲club都有o架！但當我開騷嘅時候就一定唔會去，怕會影響表現，因為每次完騷後都唔可以講嘢講得大聲。

欲再做導演

記：每逢出騷就好似軍事行動一樣。體能上，你需要幾多時間準備？

麥：首先，我會用幾個月時間去訓練，令自己有足夠氣力去同時又唱又跳，之後我就會開始諗排舞及做啲實驗。最後我就會同樂隊、舞蹈員、排舞師及總監一同用長時間討論演唱會事宜；到演唱會開始時，我嘅體力就準備就緒。

記：剛開完巡迴騷，未來有咩大計？

麥：我好鍾意電子音樂，所以好希望將下張大碟注入呢種元素，但我真係唔知會同咩人合作。其實我都有幾個計劃籌備中，手頭上有個自己寫嘅電影劇本，我好想再做導演完成佢，希望下年得啦！而我亦有意於非洲進行包括興建女子學校及開拍兩部紀錄片。

女兒具大家姐風範

除了大談未來大計，娜姐在訪問時亦大談在其新曲《CELEBRATION》MV中客串的大女兒露迪絲。娜姐大讚身為大姐姐的露迪絲好照顧細佬妹。

她說：「露娜（露迪絲之別名）絕對係超級姐姐！佢對細佬妹好好，佢同細佬洛高一時就好好一時就好敵對，好似其他典型姊弟關係，但對住最細嗰兩個大衞同梅思，露娜就好好，好識保護佢哋。」

文：外娛組