甄子丹太太汪詩詩前晚出席手錶品牌BEDAT & Co活動，瘦了一圈的她稱近日腸胃炎，又屙又嘔，日前還在家中暈倒，她說：「當日原本打算出席首映，點知喺屋企暈咗，我爸爸即時送我去醫院，佢原本想叫白車，但係我唔想，我飲咗杯汽水就好番啲，可能係血糖太低。（子丹係咪好心痛？）佢問完我有冇事，就鬧我，話我太唔小心。」

詩詩稱由於早前父親入院通波仔，又要照顧一對子女，精神緊張，才一次過爆發出來，問她會否看精神科醫生時，她直言：「我想過食安眠藥，但我向來唔支持，因為怕上癮，又驚小朋友有事都唔知，所以最後冇食。不過依家媽咪由美國返咗嚟湊我，我可以做小朋友畀佢照顧。」對於子丹未有被提名金馬獎，詩詩不諱言感到奇怪。