東京遊戲展今日正式開放給公眾入場參觀，玩家最關心自然是輕薄版PS3和PSPgo究竟有乜新嘢玩，年年都炒作嘅「Metal Gear Solid」、「Gran Turismo」不在話下，最正係連PlayStation Network都全面升呢，可用PSP Room實時對話、下載正版漫畫和影片等，女仔將來用PSP上網，就可以隨時同男友Chat餐飽。

實時傾偈下載漫畫

PSPgo玩Game靠「單撈」，就知道網上玩樂新世代經已來臨，想睇最新漫畫和影片唔需要自己轉格式，日本在年底將漫畫及多媒體下載服務引入PlayStation Store，出街接上Wi-Fi就可在PSP睇正版漫畫、聽歌和睇片。

同期加入PSP Room功能，即係類似流動版PlayStation Home（虛擬網絡社群），讓用家在PSP自行設計頭像、與好友實時對話、寫Blog和分享相簿等，唔知幾時會喺香港推出呢？

PSP Room讓流動玩家設計個人Avatar，隨時登入同好友吹水，甚至玩小遊戲。

試睇《新世紀福音戰士》又幾清楚，還可放大縮小和滾動頁面。

PSP勁Game連線對打Metal Gear Solid: Peace Walker 4個Snake

「Metal Gear Solid」之父小島秀夫今年來到遊戲展，同大家分享「Peace Walker」新玩法，今集主要講求合作，單人玩時要控制幾個Snake小組推進，同朋友雙打或4打時要合作攻破敵陣，仲可以分享物品和救援隊友等，玩法更有趣。

推出日期：2010年

PS3新作畫質勁靚Gran Turismo 5 16人齊齊鍊

幾年前開始講「GT5」，忽然殺出隻「Prologue序章」，滿心歡喜以為正式版年底見街，點知現場試玩後又話延至明年3月。不過見今集加入過千架跑車和80條賽道，支援16人連線對賽之餘，真實感比上集更強，等咁耐都係值得。

推出日期: 2010年3月

「GT5」可說最受歡迎攤位之一，賽車椅、軚盤、腳掣全部準備到足，吸引大批外國傳媒試玩。

上年「Prologue版」是「GT5」序章，當然正式版「GT5」的車款和賽道較齊全。

Wipeout畫面飛出嚟

PS3這個攤位咁多人戴住副黑超圍住，全因正在試玩3D立體遊戲Wipeout，戴住平時睇3D電影的眼鏡，遊戲畫面就有飛出來的感覺，看來真正立體遊戲技術經已成熟，值得期待。

推出日期: 2010年

「Wipeout」是上年在PS3出的高清遊戲，今次改埋做3D立體版，飛船有成架衝出來的感覺。	驟眼睇還以為官恩娜來到東京遊戲展，原來係新一集忍者外傳的Game Girl。	上年「人中之龍」將女優真人加進遊戲，今年照辦煮碗吸引大批龍友拍照。

特派記者：鍾鎮科

鳴謝：SCEH