憑《戰狼300》而被列為猛男一族的謝勒畢拿，與嘉芙蓮希歌合作兩性愛情喜劇《單身大急救》，一展其風趣幽默的一面，自言身懷大堆笑話的他，接受記者訪問時先以爛gag開場，難怪連導演Robert Luketic都稱被其笑話深深吸引。

記：記者　謝：謝勒畢拿　R：Robert Luketic

記：據聞你好鍾意講笑話？

謝：係呀，我收埋大堆經典笑話，夠我講足兩日！

記：喺新片《單》演務實又瀟灑嘅人，對感情事好有主見，咁你認為男人想要啲乜呢？性？

謝：我唔知呀！不過我相信男女都一樣，大家都渴望喺愛情中搵到激情同愛，之後一齊生活。男女之間嘅性愛關係，就係一種生命中嘅記憶，而呢種有益身心嘅記憶就係你所享受嘅嘢。

着重眼神

記：咁你覺得一對男女，喺咩情況之下先可發展成為戀人？

謝：兩個人走埋一齊，首先梗係被對方外形吸引啦，然後引發雙方嘅性吸引，咁先有機會喺埋一齊。

記：你點睇一位女士係咪有機會發展呢？

謝：我會先睇佢嘅眼神，因為從對方眼神，你可睇出佢係咪帶有激情、有冇自信、甚至係咪顯得好無助。

記：從上次的《留給最愛的情書》到今次《單》，大家都讚你很有喜劇感，其實對比起《戰》，你最鍾意邊類角色？

謝：我比較鍾意《戰》嘅勇士角色，不過仍想接拍唔同種類角色，因為當中可以學到新嘢，我亦唔想被定型。

導演激讚

記：Robert，點解你會搵謝勒拍《單》？

R：其實起初對佢冇乜印象，係製作人員推薦佢，我咪姑且同佢食餐飯，點知佢一路食就一路講笑話，成枱人都畀佢吸引住，我發現佢有種攝人嘅影響力，於是決定搵佢演呢個角色。

記：《單》講兩性之間嘅關係，點解連一場床上戲都冇？

R：拍浪漫愛情喜劇，唔一定需要親密床戰，套戲嘅重點係角色性格同個性的演繹。

記：之後仲會拍呢類題材嘅戲嗎？

R：應該唔會啦！其實我係好講求效率，對預算又控制得好，所以有好多公司搵我開戲。我一直以來拍戲都為觀眾而拍，可能到四十歲，我會拍啲自己鍾意嘅題材。

嘉芙蓮爆粗家常便飯

嘉芙蓮希歌於《單身大急救》中飾演一名電視監製，失戀後對空白的感情有另類的體會，碰上了實事求是的謝勒，由於不同意對方的愛情觀，繼而接受了謝勒提出的挑戰。對於謝勒的搞笑面，嘉芙蓮都有讚冇彈：「我好佩服佢可以揭穿所有笑話，簡直不費吹灰之力，佢真係好好笑。」

而對於戲中不少「粗口」對白，最近領養了一名韓裔B女做媽媽的嘉芙蓮直言做番自己，她說：「對我來講冇難度，因為我平時都係咁講嘢，反而要控制住唔好過咗火。」她更自爆向來愛講鹹濕笑話。

章怡英國直擊