經常聽人講，生咗BB後會冇晒私人時間，連睇場戲都唔得，有冇咁誇？問過來人楊婉儀（Winnie）就最清楚。
「我大部分時間都放喺仔女身上，仲會因應佢哋嘅成長需要而不斷作新嘗試，甚至發展成個人事業，之前試過喺網上賣童裝，依家就做咗禮儀教師。我嘅世界圍繞仔女而轉，日後佢哋讀中學，我話唔定會走去做中學教師！」
享受親子
自認是「跟得媽咪」的Winnie，為了陪伴子女，謝絕應酬、放棄私人時間，但她完全不認為是一種「犧牲」。「朋友話我好偉大，我又唔覺得係。親子時間好寶貴，仔女第日大個咗，就唔會再畀爹哋媽咪抱，能夠同仔女一起度過，對我嚟講，絕對係一種享受，所以我同丈夫都會將工作以外嘅時間畀晒仔女。」Winnie表示，雖然家中聘有傭人，但她每天都會接送孩子上下課，不會假手於人，若自己沒時間，則由丈夫頂上，多年來從未間斷過。
100%投入
在照顧子女方面，Winnie不但親力親為，而且全情投入。「之前，兩個小朋友仲細，買衫嗰陣要千揀萬揀，又要款靚又驚敏感，索性自己設計，後來仲開埋童裝店。依家仔女大咗，開始要學社交，於是我鑽研有關學問，甚至做埋禮儀導師，希望能教好小朋友。」
Winnie認為，社交禮儀對孩子成長十分重要。「有一次，囝囝Jonah無端端大力擲嘢，我問點解，佢話因為一時興奮，令我意識到，Jonah雖然懂得用言語表達感受，但就用錯行動來表現，所以我相信只要小朋友懂得表達自己，好多問題都會迎刃而解。更重要嘅係，如果佢哋一早識得乜嘢時候要坐定定吃飯、乜嘢時候可任意玩耍，唔使我不停提點或責罵，親子關係會更加融洽。」
需要變通
小朋友總會有頑皮一面，問Winnie有何管教良方，她說：「兩個細路都算乖，最嚴重嗰次係Hannah咬人，我就罰佢企喺角落（Punish Corner），畀佢知犯錯就要受懲罰，家陣佢一聽到罰企就怕怕。不過，同一方法用喺細佬身上就唔多Work，有次Jonah將飯亂掉落地，我罰佢企，佢反而覺得好好玩，後來先發現囝囝受軟唔受硬，要慢慢講道理，佢先聽教。」Winnie建議家長不要「一本通書睇到老」，教子女是要靈活變通o架！
花心思免爭寵
相信很多父母都為孩子之間爭寵問題而煩惱，育有一子一女的Winnie又點解決呢？
「喺細佬Johan出世前，我特地買咗一個公仔畀囡囡Hannah，話佢知要負責湊BB，教佢餵奶、換片，等佢習慣屋企有多一個人同住，有時我又會畀佢摸摸自己個肚，叫佢錫錫細佬……雖然做咗好多工夫，但唔係一勞永逸，尤其係Johan初出世嗰陣，全家人嘅注意力都擺喺佢身上，Hannah都有啲呷醋，成日黐住我唔放，惟有重新分配時間，喺細佬瞓覺時候陪伴Hannah，到Hannah瞓晏覺就去照顧細佬……」日子有功，Hannah和Jonah現在相處得不知幾融洽，Winnie所花的時間與心機，總算冇白費！
撰文：司徒德琳
部分攝影：郭凱敏