江若琳以「Sing model」姿態力撼「模Art」Janice Man！前晚江若琳首次為時裝展擔任模特兒，獲過百粉絲到場支持，贏盡聲勢。而只有數十位粉絲到場的JM亦唔輸蝕，以一姐姿態率領眾模特兒謝幕晒排場，兩女實行由台上鬥到台下。

前晚JM、江若琳、諸葛梓岐、汪圓圓等為「又一城時裝周」演繹ESCADA SPORT及Longchamp等品牌新裝。江若琳獲過百歌迷拉大隊撐場，跟諸葛梓岐的fans聯手對抗JM的粉絲團。雖然fans人數有別，但三人排場相若。諸葛梓岐被安排以壓軸姿態出場，JM則率領眾模特兒謝幕，至於江若琳就在大合照時企中間，各有各地位。

怕肥冇食飯

首次行騷的江若琳，自言比上台唱歌更緊張，見她愈行愈快，要記者叫她走慢點。她說：「覺得好大壓力，之前仲失眠胃痛，我又怕肥冇食晚餐，午餐只係食件三文治。」她又自爆在後台時跟其他人肉帛相見，但自己就因為怕尷尬而一早打定底。

右起：汪圓圓、鍾浠文跟Jocelyn（左三）等人示範新裝。

江若琳的粉絲團人強馬壯，向ＪＭ示威。

唔計fans多少

對於粉絲人數力壓JM，江若琳就謂：「唔好講多同少，多謝fans支持。（個勢贏咗？）唔好咁講，冇諗呢啲嘢。行騷嘅係專業model，我係Sing model，係模界新人，其餘都係前輩。」而JM亦未有理會fans人數多寡，表示率軍謝幕是大會安排，「都係一個騷，做得好睇就夠，（fans人數比江若琳少？）唔會同人比較。」

文：名人組