入行九年的李彩華，緋聞情史多姿多采，雖然堅稱與近期傳「熱戀」的仁愛堂總理王傲山只屬談得來的男性好友，但又按捺不住恨嫁心情大談現想生B時間表！不過伊人坦言即使有戀情也堅拒公開：怕麻煩，也怕連一丁點私隱亦被奪走。
緋聞情史多多
不知不覺，十六歲入行的李彩華（Rain），已經過九年的娛樂圈洗禮，由初初的青春少艾形象，逐漸變得成熟，散發陣陣誘惑女人味。愈美麗的女人，總會有相對的追求者，Rain也不例外，緋聞情史亦有幾呎厚，由N年前的方力申、林峯、丁子高，至新鮮滾熱辣的王傲山（Marcus），不是當紅歌手、小生，便是公子才俊，令不少女人「恨」得牙癢癢。
唔恨嫁入豪門
藝人對戀情的處理手法不一，有人大方公開，亦有人選擇低調或索性否認。Rain多次被「斷正」與Marcus甜蜜拍拖，但她仍矢口否認戀情，只堅稱對方是「好朋友」，問到是否有發展空間，Rain說：「再睇清楚啲先，（差啲乜？）了解清楚啲！（傾得埋？）都OK，佢係好好嘅男性朋友。」問Rain若然有戀情，會否坦承公開？她語帶維護說：「唔好呀，好麻煩，想畀番啲私隱自己，盡量唔想影響朋友，等結婚先公開啦！」
「釣金龜」、嫁入豪門是不少女人夢寐以求的事，但Rain則大唱反調，她說：「我又唔『恨』嫁入豪門喎，我自己仍有能力賺錢。」問到會否「不認不認還須認」？她則笑稱：「我冇理過呢樣嘢喎。」
談林峯：冇所謂
談及曾與她合作過拍電影及電視劇的緋聞舊愛林峯，Rain表示現時與林峯甚少聯絡，她說：「間唔中會見到佢嘅新聞，但真係冇乜聯絡，（同佢劃清界線？）咁又唔會刻意。（擔心重提陳年緋聞？）冇乜所謂，佢只係曾經同我合作過嘅對手。」
每個女人都渴望擁有完美又刻骨銘心的婚禮，Rain亦不例外，她說：「如果喺香港就最好沙灘，如果喺外地就選擇希臘、日本嘅沖繩，其實成個婚禮最好簡約而高貴。（幾時實現？）希望30歲前啦！」問到會否生BB？Rain直認不諱：「我超級鍾意小朋友，真係要有B趁嫩生。」
感激母親誓報恩
Rain年紀輕輕便入行，經歷了o靚模、歌手及演員等不同階段，問到是否仍然戀棧娛樂圈？她說：「我仲鍾意唱歌，想試多啲唔同嘅嘢，我冇後悔入行嘅，我好感激媽咪幫我唔少嘢，依家同佢關係似好友多過似母女，成日傾偈，所以喺未來日子，我要令媽咪嘅生活過得更加開心。」
舊愛逐個數
李彩華樣子甜美，身邊不乏追求者，桃花旺盛，難怪她的緋聞「快勞」也有幾呎厚，認真厲害！
方力申
李彩華出道不久，便與「飛魚王子」方力申在網劇《百份百感覺》中合作，雖然傳擦出愛火花，但未獲二人承認戀情。
丁子高
李彩華曾被拍到與楊千嬅的老公丁子高Shopping，而丁子高對Rain表現細心，曾用名車管接管送，結果惹來丁子高當時的正印女友Zoie公開指摘Rain。
林峯
李彩華曾與林峯拍攝電影《別戀》，更多次被拍到她到男方寓所度宿，而兩人的緋聞戀情維持逾年。
男友以外的……
幾個月前，Rain與蔡少芬（Ada）及劉以達等合作舞台劇，令她認識不少新朋友，亦令她的腦袋開了竅，她說：「我同Ada傾咗好多話題，可能我哋某啲經歷相似，同佢有啲姊妹Feel，當佢講佢嘅經歷時，我都忍唔住喊，好感動，佢係一個好好嘅聆聽者。（上契？）咁又唔需要做呢啲嘢。（信教？）睇吓係咪真係適合自己先，先再繼續去信，而且呢啲冇得刻意，每個人嘅想法唔同，係要一個機緣同Timing。」除了Ada外，Rain與陳敏之亦分屬好姊妹，兩人不時相約敍舊。
採訪：專案組 攝影：秦健輝 化妝：Emma Lee
髮型及場地：Daniel Chou@Hair Corner