近日應Reebok邀請為一個造型設計大賽擔任評判，好好玩！

其實大家都知道陳刀是一個出晒名設計誇張玩嘢的設計師，唔夠玩嘢唔好搞我，唔好玩唔好邀請我，就算你請我都未必會做，我其實好寸o架，唔係你請我就要做o架嘛！講真，呢啲唔係叫寸囉，其實我個人好簡單，有得玩好玩就咩都得！好似今次呢個造型設計大賽咁咪叫好玩囉！哈哈……

日前，就為這個造型設計比賽示範了四個唔同造型，認真的，其實好多人都知道設計要有天馬行空的想像力，係，真係好多人知道，不過無幾多個人做得到，點解呢？因為好多時大家都唔夠放膽，經驗談，其實你睇過好多比賽的評判都會有以下的評語：我覺得你唔夠放……

唔夠放的意思是你的表現或者你的作品可以再好啲，感覺上可能因為你太緊張或者太多顧慮，諗得太多，所以令到評判覺得你的作品差了一點點……就是這一點點足以令你的設計被比下去了。

呢個世界好現實，比賽的機會得一次，你做得唔夠放，唔放膽去做的話，你其實好清楚知道個結果會是怎樣？

我們每一個人甚麼都應該放一點，尤其是設計！

時裝設計師