近日不斷有藝人被踢爆秘密結婚，成為眾矢之的被罵大話王，但李珊珊及陳淑蘭依然「企硬」，笑言即使被罵也不會公開私人生活，力撐被指「偽人」的藝人！

李珊珊昨日與陳淑蘭、王君馨、鄧上文及洪欣等一同以最上鏡代言人身份出席Covermark舉行的「科研再生美肌系列」活動，其中鄧上文谷胸上陣，珊珊因以秀髮遮胸稍為失色。

力撐黎明講得啱

問珊珊最近可有拍拖？她說一切隨緣，是否不認及不公開以免被人鬧？她說：「咁要鬧吓我喇。（即係拍緊拖？）我覺得黎明講得好啱，有啲人真係唔鍾意公開私生活，好似我咁，除非大家感情已經好穩定啦，又或者普天同慶要結婚時我就會公開！」稍後珊珊將與舊愛錢嘉樂及郭富城等到成都參加慈善賽車，她坦言看好兩人可以奪獎：「有高人叫我今年唔好揸車，話我會撞車，所以希望到時有個專業人士坐喺我隔籬安全得多啦！」

蘭子讚黎樂好襯

陳淑蘭（蘭子）被問及藝人遭踢爆瞞婚一事時，即幽默地說：「大家踢唔到我㗎，因為我真係未嫁人！」她贊成藝人不公開私生活：「公開咗結婚又被人追住問幾時離婚？同異性出街又畀人亂講，所以唔公開就冇麻煩；最重要係好似成龍所講，有啲fans知道偶像結婚會心碎做傻事。（佢哋被人話係大話王？）有啲人係性格演員，唔鍾意公開自己私人事嘛。」

曾暗戀黎明的蘭子知道他已婚可會心碎？蘭子笑說：「我會戥佢開心，佢同樂基兒好襯，黎明平時咁認真，有個咁天真可愛嘅樂基兒可以幫佢調劑吓。」至於他日結婚，蘭子揚言定會收埋秘密進行，除了家人不會特別向人交代。

文：名人組