李彩華（Rain）前晚穿上婚紗以嘉賓身份出席設計師何國鉦的婚紗騷，她表示已不是第一次穿婚紗，以前做model和拍廣告時亦曾穿過。問她將來結婚可會公開？她說：「我自己嘅立場會公開。（你拍拖都唔公開啦！）我要等穩定咗先公開，驚公開咗之後又冇咗，要交代會好煩。」而她透露最近忙於在橫店拍古裝劇，並與吳卓羲扮演夫妻，Rain說：「我哋識咗好耐，今次係第一次合作，我拍第一部古裝劇時，吳卓羲喺戲入面係個兵嚟。（你哋有冇親熱鏡頭？）冇，不過要拜堂成親。」
另外，同場的陳煒表示婚後仍未影婚紗相也未擺酒，她說：「擺唔擺酒我同我屋企人都冇咩所謂，不過婚紗相就一定要影。老公好忙，要睇佢啲時間，佢同朋友講話好對唔住個老婆，希望今年內可以影到啦。」
