【譚倩宜上海直擊】 余文樂日前到上海出席i.t時裝店開幕派對時，自爆買衫的瘋狂習慣，他稱遇到合身的衣飾必定打孖買。問他每月的置裝費是否達天文數字，樂仔即搖搖頭謂：「唔好問我啦，真係唔想知！」

日前余文樂、張雨綺及鄭元暢等應邀出席i.t的上海新店開幕派對，貴為本地潮人的樂仔，對衣着甚有研究，他強調穿衣之道在乎稱身：「初初入行，我都會試新嘢，但係試過唔啱就要轉啦！有啲人可以着得好誇張，好似陳奕迅、黃偉文咁，但係我就偏好典型男士嘅造型，恤衫、皮褸最適合我！（有咩唔着得？）Hip Hop囉，我老喇，真係搞佢唔掂！」

望發展時裝王國

近年麥浚龍、羅志祥、韓國天王Rain等潮人紛紛染指時裝界，樂仔亦坦言有意發展其時裝王國，但現在未是時候：「始終幫人設計係好大責任嘅事，我覺得自己唔會喺法定時間內交到貨畀人，依家仲未有信心，等我第日有靈感就會做！」

樂仔的緋聞女友張雨綺同樣對設計感興趣，更經常提供意見給朋友。	陳奕迅與黃偉文衣着前衞大膽，但樂仔表示這種風格不適合自己。	放大圖片

向朋友提供意見

而樂仔的緋聞女友張雨綺同樣對設計感興趣，將來亦有意自設時裝品牌：「跟朋友去造衫的時候，自己都會提供意見，但自設品牌的事就待成熟點才考慮。」她表示喜愛隨意的打扮，亦認為女士扮靚不該是為吸引別人目光：「千萬不要為了吸引別人的目光而搞怪自己，每個人的衣着打扮都不一樣，最重要是選啱適合自己的衣着。」

文：影視組