一句「人生有幾多個十年！」令飾演「柴九」的黎耀祥人氣急升，但最令祥仔欣慰的，並非來自觀眾的認同，而是能夠在家中做好爸爸的角色，成為囝囝正橋的知心密友。事實上，兩人有着說不完的話題，校園生活、生活瑣事無所不談。這對只愛鬥車不會鬥氣的父子，今天又再開動引擎，盡情享受Family Day……

盡量見多啲

「每次拍劇都忙得日夜顛倒，陪伴囝囝嘅時間唔會多，惟有盡量爭取，若有兩小時空檔，一定會驅車回家，跟屋企人撐枱腳。有時，為咗見多囝囝幾面，我會做埋帶子洪郎。好似最近拍緊劇集《畢打自己人》，由於囝囝唔使返學，一有機會出外景，太太就會帶埋正橋來探班，正橋最鍾意拎起相機為我拍攝工作花絮，見到正橋喺身邊，無論工作幾攰，個心一樣咁甜！」

玩得投入啲

要拉近親子關係，最緊要彼此有共同話題，祥仔當然識做，一有假期，他就會和家人由朝玩到晚。「正橋細細個已經對『車』情有獨鍾，無論係真車抑或模型車都咁喜歡，每次知道邊度有車展，都嚷着要去，我當然會奉陪到底，玩埋一份，有時踩單車，有時玩碰碰車，最近就多咗玩小型越野車，一來安全，二來有速度感，大家鬥快過終點，好開心呢！」

溝通做好啲

除了陪玩，祥仔亦很着重溝通質素。「家裏有不明文規定，開飯時一定要熄電視，我嘅用意唔係要限制囝囝睇電視，而係想畀機會大家多啲溝通。事實上，睇電視係一種好單向嘅活動，長時間以電視送飯，會減少一家人嘅交流互動，況且有好多電視節目純為娛樂成人觀眾，唔太適合小朋友收看，睇得太多會影響思考。我覺得自己最成功嘅地方就係令囝囝唔會主動去扭開電視，亦唔會因為冇電視睇而發脾氣。同樣地，小朋友亦不宜接觸電子遊戲機，若然沉迷打機，最終會搞到佢淨係識得同部機器溝通，所以正橋從未擁有過一部電子遊戲機。」

愛要露骨啲

講到底，要搞好親子關係，最重要是一個「愛」字，凡事以「愛」行先，孩子才會懂得如何去愛父母。

「愛要宣之於口，更加要付諸實行，以行動去令孩子感受到父母的愛，所以平時我會攬吓囝囝、錫吓孩子，有時玩到身水身汗，更加會替佢抹汗。」祥仔坦言，中國人有時太含蓄，尤其係父子間好少會有親密接觸，其實只要爹哋們肯踏出一步，主動用言語或行動去表達你對孩子的關心，對方一定會Feel到。

一人分飾二角

在戲劇世界裏，要做好一個角色，有演技就夠；回到現實生活，每個人要扮演不同角色，自囝囝黎正橋出世以來，祥仔一人分飾二角，既要做好丈夫，又要做好爸爸，全靠一顆真心，以及無私的付出。「童年是教導孩子的黃金時間，而且小朋友最需要父母的關懷，否則好易走歪了路。」究竟大忙人祥仔怎樣維繫親子關係？

教仔大忌：發掘興趣咪玩強迫

不少家長都好怕子女輸蝕畀人，除了緊張其學業成績，亦很着重課餘活動，甚至狂報興趣班，結果弄巧成拙。「童年過去咗就冇，做父母應該要畀孩子活得快樂。有段時間我哋安排正橋學琴，太太想佢練多啲，佢就嫌悶唔肯彈，搞到大家都唔開心。我覺得，接觸音樂應該令人開心，既然做唔到預期效果，倒不如唔好學。其實我同太太當時希望發掘囝囝嘅音樂才華，想佢一朝成材，依家諗番轉頭，如果學習過程唔開心，甚至破壞一家人嘅感情，就算將來囝囝彈琴彈到幾有成就，又有乜用！」

撰文：司徒德琳

部分攝影：張群生