這兩個星期，個頭痛到癲咗！其實我從來都未試過頭痛，原來頭痛真係好難頂……

我自己都唔知點解突然之間會頭痛得咁犀利，有時痛到個人好嬲黑晒面，因為真係好痛！呢幾日瞓覺仲會痛醒，你直情是覺得個頭會爆開，咁嘅情況當然要去睇醫生啦！醫生初步檢查完之後，話我身體完全正常，連止痛藥都無開畀我，醫生話可能是我工作壓力太大，又或者係眼鏡的度數唔啱，點解我次次睇醫生，醫生都問我做嘢係咪壓力好大？乜我家陣成個人都好大壓力咩？醫生仲話其實保險啲就去照吓個腦，睇吓會唔會是血管天生畸形，或者有纖維瘤。唉……我唔知！

通常呢啲時候，你就發覺自己周身骨痛，咁就去睇跌打啦！點知跌打師傅話我整傷咗頸椎同氣門……吓？唔係啩？我都無整親過……突然間傷咗！農曆七月唔係真係咁邪呀嘛？師傅話呢個可能是令我頭痛的原因……我心諗如果係就好啦！起碼我知自己衰咩呀！大家都知道，唔知頭唔知路估吓估吓，個人囉囉攣好辛苦，痛都無所謂，最弊是你唔知點解痛！

呢個時候，通常都會同自己講……人最緊要係咩呀？身體健康。

時裝設計師