近年狂吹環保風，連香港這片石屎森林都搞起生態遊，但天時暑熱唔想行山大汗疊細汗？不如落涼浸浸海水拍攝海洋世界！西貢對出橋咀尖洲一帶是香港浮潛及潛水勝地，更被譽為小丑森林，可看到《海底奇兵》（Finding Nemo）中的「Mo仔」，今次就由新進o靚模Connie帶齊防水相機落水搵真正Nemo。

浮潛機仔拍片都掂

香港雖然冇大堡礁咁大片珊瑚，但在海岸公園和淺水帶仍可浮潛看到一些珊瑚和海洋生物，最啱帶部Zoom得遠又拍到片的相機捕捉海底美景。適逢夏天大批防水DC仔出爐，好似Panasonic TS1、Canon D10等都支援長倍Zoom和IPX8國際防水規格，一般浮潛或游水可連續拍攝30分鐘，而Sanyo WH1影相之餘兼拍埋720p高清拍片，仲內置30倍光學變焦，自己拍番輯《藍地球》一樣掂。

俗稱Housing的防水殼可潛到落40米，在香港水域都夠用。	Sanyo VPC-WH1 售價：$3,680（a）	不少防水相機支援720p拍片功能，在水底拍短片也十分方便。

VPC-WH1規格表

感光元件：1,100萬像素CMOS

鏡頭焦距：43~1,290mm（30倍光學變焦）

快　　門：1/2~1/500秒（影相）1/30~1/10,000秒（拍片）

光　　圈：f/1.8~f/4.3

體　　積：112.4×58.7×62.8mm

重　　量：311g

40米水底加殼任影

防水DC仔大多只去到1.5~10米，想真正潛落海底影珊瑚，專業用家便會選擇使用俗稱Housing的防水殼。Sony、Canon等大廠都有為旗下相機度身設計專用殼，好似街賣千多元的G10專用防水殼，落到40米水底都可隨意變焦和拍攝，畫質絕對有保證。坊間另有一些數百元的密實防水袋，如較常見的DiCAPac同樣備有防水效果，但由於相機本身承受唔到深海水壓，所以只適合浮潛。

G10規格表

感光元件：1,470萬像素CCD

鏡頭焦距：28~140mm（5倍光學變焦）

快　　門：15~1/4,000秒

光　　圈：f/2.8~f/8

體　　積：109.1×77.7×45.9mm

重　　量：350g

小丑森林潛水勝地

別以為香港只得山多，落到水底一樣搵到美景，當中尖洲便是最多小丑魚聚集的水域，可看到多種珊瑚魚和海葵等軟珊瑚，故有小丑森林美譽。香港潛水總會副會長Alfred表示，其他地方如東坪洲、赤洲和牛尾每逢假日都吸引不少潛水愛好者在海底暢遊；就算唔識潛水的人士，都可在西貢對出的橋咀和沙塘口玩浮潛，水清季節可看到珊瑚、蟹仔等海洋生物，唔會悶親初學者。

初學者宜浮潛於水面欣賞海洋世界，橋咀和沙塘口都是不錯的浮潛熱點。	香港潛水總會有40多個屬會，經常舉辦潛水訓練、海洋活動和攝影班等。	香港海底可找到百多種硬珊瑚及軟珊瑚，在春夏水清的季節欣賞最為適合。
西貢橋咀水質較清，尖洲可看到小丑森林，而東坪洲、赤洲、牛尾等也各具特色。

潛水攝影專人教路

現時潛水已變得大眾化，一般租潛用器材和船隻每人夾幾百元就可玩成日，Alfred表示香港潛水總會40多個屬會提供各種潛水服務，例如在香港考初級潛水牌需上「Open Water Diver Course」，大約個半月時間便可潛水，費用$3,500左右；之後可報「Photo/Video Taking Course」學習水底拍攝技巧和分享常見問題等，大約$2,000搞掂，吸引到不少發燒友參加。

有小丑森林之稱的尖洲可看到小丑魚，即係《海底奇兵》裏面的「Mo仔」。	除了「Mo仔」外，還有不同種類的珊瑚魚，平時都幾難咁近距離接觸。	Alfred表示，浮潛團都會帶大家去一些睇到珊瑚、蟹仔等生物的地方。

撰文：鍾鎮科

部分攝影：方偉堅

模特兒：Connie Lam（Sun Entertainment）　化妝：Shirley（Choosy Pro）

查詢電話：（a）2193 6528、（b）3191 2333、（c）2185 7791

部分相片由香港潛水總會提供