睇波賭波講波，幾乎是男人天下，女人參與也只屬小眾。但自從萬人迷碧咸出現，球場多了不少尖叫聲，睇波已非男士專利，球場也非女人禁地。男球迷通頂睇波、炒波衫，未見瘋狂；女球迷去得更盡，每年買埋機票，越洋睇偶像蒲頭數秒，這份神心才真正比「金」堅！

與偶像過生日

Facebook友人Priscilla（呂詠恆）屬意大利網絡，但她是百分百香港人，也非意籍；但自2002年世界盃情陷意大利國家隊隊長馬甸尼（Paolo Maldini）後，幾乎每年到米蘭親身捧偶像場，愛意由足球衍生至意大利的一切，索性將自己「Italianized」（意大利化），以別名Milan's Babe自居。

這位「意國戀人」，近期又倒數米蘭之旅的日子，因為伊人幾乎每年12月都在米蘭睇波度過生日，更曾為自己炮製一件別出心裁的生日禮物——在生日正日見偶像一面。數年前，在只有攝氏數度的米蘭寒冬，Priscilla孤身在AC米蘭的訓練基地外呆等偶像數句鐘，幸好皇天不負有心人，馬甸尼駕着座駕出現，二人合照之餘，並為Priscilla寫上生日祝福語句！

只愛意大利

Priscilla雖稱得上是瘋狂球迷，但情迷止於意大利，香港球員難以俘擄她的芳心：「論樣貌論球技，始終是外國球員取勝，何況香港球壇宣傳少，體育版多數都講外國波！」球迷世界始終男多女少，畢竟屬男性活動，Priscilla自言在同性友輩間難覓知音，家人又以為她睇波是由賭波而起，要到網上討論區，才可盡情分享賽果。Priscilla表示，以AC米蘭的香港討論區為例，男女比例約佔七比三，男的喜歡討論球員技術；女的技術分析較少，不過越洋朝聖者就以女性居多：「男球迷通常會成隊球隊鍾意，揀一兩個技術型球員追捧，始終佢哋自己有踢開波。」自從碧咸出現，Priscilla發現女球迷數目激增，球星有偶像化趨勢：「球會愈來愈鍾意將球星當明星咁捧，吸納多啲女Fans，球會收入自然增加，唔係皇家馬德里點買得起C朗呀？」曾多次到意國觀賽的Priscilla，有感外國的足球風氣鼎盛得多，她表示，3歲至80歲市民對球星名字瑯瑯上口，睇波不只是家庭活動，也是拍拖活動：「不過，當地男球迷表現有時頗為激進，大爆粗言穢語屬等閒事，有時甚至掟水樽，所以我會選擇在女球迷聚集的橙紅區域觀賽。」

文彼得　女粉絲佔七成

意國球星如影壇巨星，見報登雜誌封面已屬家常便飯；本地球星文彼得也不遜色，球技精湛之外，樣貌俊俏，近期亦加入了球星偶像化的國際大趨勢，與BMA簽約，向娛樂圈進軍，早前參與電視電影《南華夢飛翔》的演出。

本身Fans多多的他也承認，自從碧咸出現，女球迷增加了不少，睇波講波已不是男生專利。以他的Fans Club為例，女性球迷佔七成，Fans不定期舉行聯誼活動，文彼得坦言與部分球迷已成了好友，不過從未被女球迷追求：「其實球迷的支持好重要，有陣子我表現欠佳，在一場賽事中終於破蛋入球，球迷隨後如慶祝生日般上前道賀。」男生雖然對足球充滿熱情，但對偶像球星的支持方式則較含蓄，不像女生般表現直接：「曾有位男球迷同我講，佢唔係追我，叫我唔使驚佢！」雖然愈來愈多女仔睇波，文彼得表示男女球迷都無所謂，最緊要係愈來愈多人支持香港足球運動！

撰文：彭欣欣

相片提供：被訪者