向來御夫有術的何超儀昨日又出招，她表示近日發覺老公陳子聰「靚仔咗」，為防有人乘虛而入，自認是「小器婦人」的她設計以手槍圖案為概念的手袋，當遇上「妖孽」便用槍指嚇對方。她又否認懷孕為賭王沖喜，笑言只是未放屁一肚氣！
何超儀、徐濠縈和Lisa S.昨日現身i.t時裝店活動，三人分別展示為手袋品牌Mata Hari親自設計的作品。一向「食住」老公陳子聰的「惡妻」超儀，長形手袋作品上印有機槍圖案，她笑言：「老公近期『靚仔咗』，多咗fans。你知我小器，同佢出街萬一遇到『妖孽』，但又唔講得出聲，我心入面係一個憤怒婦人，所以要用槍頭指住佢『示威』。佢咁靚仔，唔可以成日鬧，（感受到威脅？）感受到，所以要攞支M16出嚟。」
尊重彭浩翔才華
對於有傳她懷孕為父親賭王何鴻燊沖喜？超儀即拍拍肚皮否認有喜：「即係話我肥咗，沖喜定沖氣呀？嗰日肚凸可能係一肚氣，放咗個屁就出氣。（幫爸爸沖喜？）唔使，我哋都唔信呢啲嘢。」
另外，有指她首部投資電影《維多利亞壹號》，與導演彭浩翔因剪片問題鬧不和，她承認原定十月上映要延期，又表示目前交予律師處理，不便透露詳情，但強調十分尊重對方才華。
徐濠縈愛女大晒
同場的徐濠縈設計一個星形手袋，她表示首個用家是女兒康堤：「會留畀佢大個啲用，屋企所有嘢都留畀佢，（囡囡讚你叻？）佢成日都話媽咪好靚，（Eason呢？）佢會叫佢做fat fat。」
文：專案組 攝：李廣成