日前經歷了一件人生入面最荒謬的事，遇上的人簡直是不可理喻！

長話短說……話說周末蒲完蘭桂坊之後，消夜當然是指定動作，而去翠字頭茶餐廳亦都是一眾蒲精的不二之選。

朋友點了文昌雞飯，發現文昌雞變了怪味雞，叫侍應換過，誰不知……這個不知所謂的侍應態度差之餘，還在我們面前用手𢲡碟怪味文昌雞入口試食，還大大聲同大家講：我覺得碟雞無問題囉！

嘩！那樣精彩的真人騷，令我們成枱人目瞪口呆……隨之而來的問題是：第一，侍應大哥你言下之意則是話我們屈你碟雞有問題？第二，你用手𢲡過碟雞，咁你係咪想我哋繼續食你口水尾先？你覺得食客人的口水尾無所謂，不過我唔會囉！我諗食一個陌生人的口水尾……會唔會太唔衞生呢？

之後侍應大哥咪晦氣換過碟雞，不過好唔順超講咗一句：送畀你哋班人食㗎！點呀？家陣我有話過要食霸王雞咩？我無錢要乞你送碟雞畀我呀？

最後，當然起身走啦！

文昌雞變怪味雞再變霸王雞，最後上枱的……應該變成加料雞！加咗咩？你自己問番個侍應，我就唔敢食啦！食咗都背脊骨落……

時裝設計師