袁潔瑩與同性密友阮嘉欣關係明朗化？前晚兩人拍拖出席公開場合，且大方面對鏡頭，袁潔瑩稱無意倣效何韻詩公開性取向，但明言結婚生仔的重擔要交由兩位弟弟孭飛。

袁潔瑩與榮文蔚的姑仔阮嘉欣相識，始於○五年，之後兩人經常糖黐豆，近年更經常結伴出席公開場合，感情愈來愈穩定。前晚她們便拍拖出席香港傳藝節仁濟慈善晚宴，大方企定定讓記者拍照，之後阮嘉欣識做地自動行開，好讓袁潔瑩接受訪問。

Rosemary早前自我增值，到大陸學普通話。	莊思敏為鄭兆良的時裝騷行騷。	Jocelyn演繹另一款晚裝。

結婚生仔等細佬

對於早前何韻詩公開自己的性取向，問袁潔瑩會否考慮倣效時，她吓了一聲，說：「未到最後一刻唔知，可能我突然會生仔呢，（屋企人接受到你同阮小姐拍拖未？）我有好多好朋友，去唔同活動會有唔同拍乸，搵唔同嘅人陪，（屋企人有冇畀壓力？）爹哋從來冇畀壓力我，冇開口講過，佢淨係希望我開心，仲幫我安排埋我四十歲之後做啲乜，佢都係想我哋開心，我仲有兩個細佬，結婚生仔落喺佢哋度多啲，不過細佬仲未有乜嘢行動。」

蘭子帶美女亮相

此外，早前透露與名模Grace Yu 合作開模特兒公司的陳淑蘭（蘭子），前晚兩人拖着一名長髮美女到場，向外介紹她是旗下的模特兒，名叫Kristy，對於今屆港姐質素差，問她會否鼓勵旗下模特兒上選美台，她說若有適合電視台發展的女仔也會考慮讓她選美。前晚名模Rosemary、Jocelyn和莊思敏為大會擔任模特兒，演繹鄭兆良的時裝騷，Rosemary透露早前到大陸學普通話，自我增值，不想再提感情事。

文：名人組