求學不是求分數，即使在娛樂圈發光發亮，賺到盆滿缽滿的藝人，學生時期也非位位高材生，甚至每逢測驗考試都諗計仔出貓。不過，他們以過來人身份提醒學生們，靠自己努力讀書吸取知識，才是最重要。
今次找來一齊拍電影《愛出貓》的五位青春偶像陳偉霆（William）、鄧紫棋（G.E.M.）、詩雅、James及Ciwi，大爆他們讀書時有甚麼出貓招數。
William：我覺得讀書時期一定離唔開出貓，所以拍《愛出貓》時，勾起我好多回憶，記得當年會考放榜後，轉咗去另一間學校，都試過出貓，我呢啲係好傳統方法，就係偷睇隔籬同埋寫紙仔，不過啲女仔就好堅，個個寫晒喺大髀內側，搞到監考阿Sir唔敢望，其實我不知幾想去睇，但唔敢問咋！
G.E.M.：咁啱嘅，我都係用偷睇隔籬呢招喎！其實我讀書一直都OK，小學時因為學費貴所以轉去中文學校讀，根本都適應唔到，惟有偷睇囉！
詩雅：冬天校服好長，我就把字條收藏喺衫袖入面，呢招喺背默時最好用，逐少逐少褪出嚟抄，哈哈！
同學失手唔敢再試
James：細個用中華牌鉛筆，就會將支筆嘅紅色位寫晒答案，驟眼睇成支筆係黑色，唔會知道原來有答案喺上面。
Ciwi：你哋係咪次次都咁成功，有冇失敗過？
G.E.M.：我好多時都好高分，失敗就冇，只係試過隔籬位同學衰咗，我梗係即刻收手啦！當時都不知幾驚險。
William：其實出貓都壓力大㗎！明知唔啱都要做，簡直比入娛樂圈壓力大好多。
學生哥愛發豆芽夢
James：除咗出貓，大家讀書時有冇難忘事？
William：我有好多㗎！讀男校放學時就有好多女仔喺門口，我都收過好多封示愛信，雖然最後冇一個拍過拖，但啲信我keep到依家，因為呢個年代有電腦，唔同以前連嗌交都好似寫論文咁。
G.E.M.：我小學都有寫過情信畀人，內容好似問卷咁，會將電視劇人物角色關係作為示愛，好搞笑，大個啲就試過為咗識個補習班男仔，竟然去佢平時搭開嘅港鐵站等，雖然唔係好靚仔，但都有金城武咁嘅外形㗎！
詩雅：讀夜校時試過收過一個男仔好多卡，每張都用我個名開頭，不過到今日我都未見過呢個人，真係好想知係邊個。又試過中二、中三與同學拍拖，本來冇人知，但後來因為對方唔見咗銀包，入面有我同佢嘅合照，結果搞到全校都知。
突擊測驗William包尾
為測試幾位年輕人對娛樂、時事及文字的認識，本報特別向眾人來個突擊測驗，並要求於指定時間內完成作答，怎料眾人打開試題即皺眉，當中會考達21分的G.E.M.更停晒手，James就靈機一觸打電話向同事求救，詩雅見狀亦搵助手幫拖，G.E.M.則豎起耳朵聽答案，結果眾人你抄我、我抄你，絕對名正言順出貓，所以他們的答案幾乎同出一轍。
不過問到新進o靚模中文名時，William卻全部留空，看來他只懂回答女友Angelababy的中文名字吧！結果就因為放棄這條題目，William即成為大輸家。
採訪：影視組 攝影：馬永堅
化妝：陳偉霆（Davina @ Beauty Tech）
詩雅（Meegan）
鄧紫棋（Jan @ Annie G Chan）
James、Ciwi（諺瞳小白宮
Picturesque Gate）
髮型：陳偉霆（Davy @ Chin.G）
詩雅（Zap @ Chin.G）
鄧紫棋（Morris @ Ken Qi）
James、Ciwi（Sam Cheung、Sa Kong @ HAiR）
服裝：DKNY JEANS @ James、Killah @ Ciwi