日前東西鐵終於接通，港鐵話為港人帶來前所未有的方便，不過，同樣地為港人帶來前所未有的混亂，我是用家我絕對有資格講！

東西鐵接通的第二日，我在紅磡站搭東鐵線入沙田，撞鬼囉！如果你問我，我會用不知所謂來形容所有的安排，無錯是所有，我完全不能接受！

第一，個電子顯示屏咩事呀？放在車站最唔當眼的地方！你叫我點睇到下班車幾時開同喺邊個月台開呀？你係咪玩嘢呀？喂，港鐵高層，你都有去過日本o架！人哋個電子顯示屏大大個咁放喺入閘嗰個位，你哋醒啲啦，得唔得呀？

第二，有人攞住啲牌話畀你知下一班車喺邊個月台開出，錯嘅！全部人畀個牌老點咗！有無搞錯？叫晒所有人落嚟1號月台等8分鐘，但係4號月台班車2分鐘後開出，咁點解要老點我落嚟呢個月台等8分鐘？老點人好過癮呀？

第三，嗰啲所謂的廣播，我話畀你知，我一句都聽唔到，我唔係講笑！個喇叭啲聲拆嘅！鬼食泥咁……

我真係想問吓港鐵憑甚麼可以話通車之後，服務大致暢順？你哋究竟有無親身落過嚟紅磡站o架？坐喺辦公室發稿無用o架！你落嚟睇吓先啦！

時裝設計師