在香港，有熱心店主收養流浪貓狗，不但因此而得到一個好夥伴，還得到一個看檔好拍檔！流浪狗「啫喱」多得店主收養才得溫飽，是以也非常識做，每天都落力看檔，風雨不改，更成為店中人氣狗巨星，助主人生意興隆。

鎮店之寶：啫喱

啫喱在大埔土生土長，現年五歲的牠自小被檔主曾生收養，在位於大埔著名粥麵店「陳漢記」旁的報紙檔坐鎮，閒時多以前腿放在桌上，半挨半企的一眼關七，加上迷人眼神，人氣猶如附近的「阿婆豆腐花」，家喻戶曉。佢之所以有今日成就，全因與曾生的一次偶遇。「啫喱是一隻自來狗，記得那天風大雨大，當時佢成身濕晒，甩毛又生螆，眼見佢咁可憐，於是決定收養。」曾生說。

自此之後，曾生就視啫喱如朋友，給予溫飽，而啫喱也醒目報恩，每次顧客多時，會自動走到檔口另一邊幫手，客串「閉路電視」！「試過有人想執走檔口的紙皮，剛動手就被牠吠走了！」曾生笑說。神犬啫喱不但識看檔報恩，原來冧人功夫也相當了得，訪問期間，就連隔籬小食檔阿姐也忍不住說：「有次啫喱見曾生囝囝坐緊嗰張櫈就跌，佢就立即跑過去推正佢；見到曾生孫女喊，又會上前錫佢，仲識聽主人訴心聲，好識氹人㗎！」說罷，啫喱立即獻吻給阿姐，咁識做，抵啲街坊咁錫佢嘅！

小時候的啫喱甩毛又生螆，幸得曾生收留，才有容身之所。	人多時，啫喱會站在門外，幫手睇舖！	啫喱小時候還未夠高站在櫃枱，惟有以大班椅輔助一下！
客人買報紙時愛與啫喱「爹」幾句，牠也會吠幾聲回應。

撰文：楊芷穎

部分攝影：陳富權

部分照片：由受訪者提供