年代真係唔同咗，以前細個一提起Band友，便與「死飛仔」掛鈎，若然女仔人家走去夾Band，唔畀阿爸阿媽用藤條打餐飽就奇。雖然社會對夾Band接受程度高咗，不過全女班的樂隊，在香港仍然少之又少。兩個初出茅廬的妙齡少女莫凱惠（Emily）和莊玉鳳（Carol），與另外三位成員自組地下樂隊，為的只不過是尋找一個未圓的夢，從中更找到深厚的友誼。
邊夾Band邊練習
Dream Girl是一隊由5個女仔組成的地下樂隊，小記曾在一個小規模的慈善Show上看過她們的演出，由於是全女班的關係，令人印象深刻。在訪問之前，小記還以為她們經過多年的練習，所以站在台上沒有一點怯場，經細問之下，才知道Emily和Carol夾Band的年資還不夠一年。
本身是鋼琴教師、擁有多項音樂證書的Emily，是Dream Girl的始作俑者。她自言從來未正式學過結他，只是一邊夾Band一邊練習，她說：「就係因為唔叻，啲勁人未必會同我玩，所以才周圍搵一班志同道合的女仔，大家一齊由零開始，會夾啲，又好玩！」Emily說當初搵人都有難度，而Carol也是經朋友介紹才認識的。
乜都笑餐飽
因為大家從事唔同行業，這隊女子樂隊「齊腳」的時間並不算多，不過每次聚頭，都總是笑不攏嘴。Carol說：「我哋成日都笑，都唔知笑乜㗎，彈錯又笑，入唔啱Beat又笑。」她記得有一首歌，Emily需要兼顧Guitar和Keyboard的部分，但她只顧彈結他，忘了要走位，結果經常被隊員取笑。
別看她們說得輕鬆，能夠站在人前表演也不是容易的事。Emily表示她們基本上每日都會花時間自己練習，出Show前當然會更加勤力，每周成隊人一齊夾兩、三次；夾歌時會共同研究如何彈好些，及商討某些細節位和編曲等。背後的努力雖然別人未必知道，但過程中的樂趣和默契，同樣亦只有她們才感受得到。
最緊要開心
取名「Dream Girl」，因為玩音樂是她們共同的夢想，一班人由互不相識到成為好朋友，這種友誼和默契得來不易。沒有想過樂隊會成名，能夠有機會出Show已很高興。Emily說：「搵人夾Band唔難，但要搵到合拍的人就好難。我哋幾個嚟自唔同的背景，相同的地方係大家都鍾意音樂，好夾，好開心，好想可以一直夾落去！」正如現時的年輕人一樣，做一件事未必需要原因，也不計較結果，最緊要就是開心！
女子Band推介
只要上網查一查，便會發現海外有不少純女子樂隊組合，以下是Emily和Carol其中一些心水推介。
台灣：緋緋兔
緋緋兔（FiFi Two）由3位來自台中的女生組成，她們標榜「快樂搖滾」，期望藉着音樂將快樂傳給每一個人，作品包括《冒險星球》、《遇見你》及《靡爛的大學生活》等。
英倫：Eisley
正確來說，Eisley是由二人女子組合Siblings及其他朋友組成的樂隊，他們的Indie Rock音樂風格獨特，曾推出過兩張大碟，成名作有《Go Away》、《Invasion》及《Telescope Eyes》等。
向電結他之父致敬
電結他是Band友的靈魂，大家未必知道，原來電結他是20世紀的產品，於1952年由Les Paul為結他生產商Gibason所發明，自始成為搖滾樂手恩愛之物。可惜的是，這位堅持活到老彈到老的「電結他之父」，剛於本月13日因病辭世，享年94歲。
一個人大合奏
「Guitar Pro 5」是一款專為結他手而設的軟件，提供視譜、製譜、編曲、播放等功能，而且支援多聲軌（Multi-tracking），可用不同種類的結他、Bass Guitar、敲擊樂器等合奏，甚至玩二重奏。
網址：http://www.guitar-pro.com
平租Band房
最多人識的Band房一定是「二樓後座」，但其實港九新界也有不少出租Band房，如這家位於旺角的Natural Music Center，面積較細的Band房，租金每小時甚至低於$100，相當抵玩。
查詢電話：2300 1006
撰文：陳若冰
攝影：盧展程
場地提供：WeRun