出道短短兩年的周秀娜（Chrissie），在書展期間可謂「威到盡」，除了雄踞各大娛樂頭條及雜誌封面之外，「牙刷」、「雪糕」更成為她的標籤。是行運還是實至名歸？Chrissie堪算是一個異數！正當大家以為這位「翻版樂基兒」會朝名模方向發展時，豈料她卻視演員為終身職業，寧做實力苦戰的羅蘭，都不做平步青雲的樂基兒。
本無意成為各界焦點的周秀娜，在書展期間竟戲劇性連續兩星期登上各大娛樂頭條及雜誌封面，對於成為頭條女郎，Chrissie卻沒有預期中的飄飄然，反而貫徹其冷靜作風，她說：「初初入行我真係冇諗過自己可以有今日，但我又唔會輕易話滿意，我覺得每個藝人喺唔同嘅階段，應該有唔同嘅目標，太容易滿足好易畀人淘汰。」
模特兒只是起步
滿腔理想的Chrissie，在娛樂圈的終極目標又會是甚麼呢？年賺千萬？坐擁半山豪宅？或是取代樂基兒成為新一代性感索模？Chrissie卻出奇地表示：「我想做演員，我覺得模特兒只係起步，亦唔夠長久，所以我想拍戲，我會視呢個為終身職業，我唔介意做到六十歲！」綜觀現今娛樂圈，屹立不倒、活到老演到老的女演員有羅蘭、鮑起靜及李香琴等，表面為求上位、狠拋身段的Chrissie，背後竟有着一個如此理想，着實讓人刮目相看。
不介意在人前展現各種誘人甫士的Chrissie，寫真集內的「牙刷」和「雪糕」照更惹來外界抨擊，雖看似開放，不過這位剛烈女孩，鏡頭背後原來極之慎言；每當被觸及內心深處，Chrissie總是欲言又止，相比起她初出道接受本報專訪時，率直的表示「我諗我似樂基兒多啲，因為阿嬌（鍾欣桐）靚咁多，我點可能似佢？」明顯少了鹵莽、多了老練。
問到Chrissie是否因為人紅後要修身立德，故對傳媒變得謹慎時，她表示：「其實我當初嘅意思係指阿嬌同Galie（樂基兒）兩個都咁靚，可能我講得唔好，令人誤會啦！當然我依家面對傳媒會謹慎咗，但so far所有嘢都係出自我內心同真心去講。」
負面抨擊得啖笑
情願寡言，不欲假語的Chrissie，面對隨着人氣而來的閒言閒語，亦處之泰然，彷彿這個世上已沒有東西能夠擊倒她，Chrissie直言：「無論負面新聞抑或批評，我唔會理其他人點睇，我亦控制唔到，對我嚟講所有嘢只係娛樂新聞，睇完笑吓就算，只要大眾攞到娛樂嘅，我都冇所謂，最緊要我知道自己做緊乜。」
雖然Chrissie如此抓緊宗旨，不過面對排山倒海的負面抨擊，她直言還是得花一段時間適應：「初頭一定唔開心，唔明啲人點解咁諗，但我覺得一個人唔可以永遠停留喺唔開心嘅位。」
男友冇得彈
一個人的性格不多不少取決於成長背景，Chrissie亦不例外。出身潮州家庭，家有父母一兄兩弟，在這種「陽盛陰衰」環境下長大的Chrissie，直言「烈女」性格亦是由此培養出來：「我鍾意有自己嘅見解同親手解決問題，由細到大我好少搵人幫手。呢樣嘢同我成長環境確係有啲關係，我父母對我哋要求好高，佢哋希望我哋可以獨立，由四歲開始，我已經分擔家務。」
家人做經濟後盾
談到家人，Chrissie不忘澄清他們並非傳聞所指的包袱：「雖然私事我唔想多講，但我想話入行以嚟，我一直冇乜捱過苦，因為屋企人一直喺我背後支持我，經濟同精神上都有。」
對於家庭觀念深厚的Chrissie來說，結婚誕子亦是不可或缺：「依家我事業先叫有小小成績，我梗係唔會放棄啦，但其實我細個嗰陣，係諗住廿四歲結婚然後生仔，因為我好鍾意小朋友，我覺得早啲結婚生仔，同小朋友嘅代溝會冇咁大，同埋我好想做後生嘅靚媽咪。不過我依家都冇諗呢啲，到三十歲先算。」
一個幸福家庭，除了要有靚媽咪及精靈小孩外，當然還需要負責任的父親，對於Chrissie來說，現任男友Avis絕對是上佳人選：「我覺得男女關係，最緊要互相尊重，我男友就做到呢樣，佢一直好支持我，每當佢知我唔開心，佢就會講啲好爛嘅笑話去氹我，佢絕對係我嘅開心果，而且佢係一個好孝順、事業心好重同EQ好高嘅人。」
後記：哭，只為一件事
無論外表再硬朗的女性，內裏難免會有脆弱的一面，表面看似「刀槍不入」的Chrissie亦然。當記者打趣問她最害怕的東西是甚麼時，她即搶答大叫：「青蛙！我由細到大都好驚呢樣嘢，如果有反青蛙大聯盟我一定會加入，然後用炸彈炸死晒佢哋！」除了青蛙，堅強的Chrissie另一個天敵是自己：「我只會為一樣嘢喊，就係當我覺得一件事做得冇想像中咁好，我就會因為忟自己而喊。」
文：葉晶晶
攝：馬永堅
場地：privacy@銅鑼灣
化妝：meegan shek
髮型：zap@chin-g
服裝：2％